|
بناء الثقة بالنفس 15
الناقل :
SunSet
| العمر :36
| الكاتب الأصلى :
Mostasharnafsi
| المصدر :
kenanaonline.com
تعلم رصد السلوكيات الخاطئة...
بنقول رصد السلوك...ولم نقل مثلاً ملاحظة...لأن كلمة رصد تشير إلى تمام اليقظة والمراقبة..وهذا هو المطلوب..إنك تصحصح لنفسك وتراقب تصرفاتك ....لماذا؟..تعالى نلخص اللى قلناه..فيه عندنا مفهوم سلبى حول الذات وهذا المفهوم كامن فى عقلك الباطن...ويؤدى إلى توقعات سلبية عند مواجهة مواقف الخطورة ومشاعر سلبية مصاحبة وينتج عن ذلك سلوك خاطئ مثل التجنب والهروب أو الإفراط فى الإحتياطات لدرجة الوسوسة...والسلوك مشكلته أنه يحدث أحياناً بحكم العادة أو بشكل أوتوماتيكى بمعنى أنك ربما تدرك أن لك توقعات سلبية وتختبرها وتضع توقعات واقعية لكن قد تتصرف بنفس الشكل الذى تعودت عليه ف مثل هذه المواقف تقدر تقول بحكم العادة وللدقة نقول أنها مشكلة الإرتباط الشرطى الذى يشكل جزءاً كبير فى تشكيل سلوك البشر....يعنى فى الموقف الفلانى أتوماتيك بأتصرف بهذه الطريقة....طيب تعمل إيه؟ يبقى لازم تراقب نفسك كويس ونشوف موقف مشابه لموقف الأستاذ ع أو أى موقف خطورة عموماً ياترى حتتصرف إزاى؟
-حترفض وتتجنب الموقف...وأنت مش واخد بالك إنك بترفض لأنك خائف من تقييم قدراتك..يعنى ممكن ترفض لأنك حاسس إنك تعبان مثلاً...والتعب هنا ممكن يكون حاجة بنسميها أعراض الجسدنة يعنى القلق يتحول لتعب جسمانى...لو جت لك دعوة كده ولاقيت نفسك همدان ورافض تروح بحجة إنك تعبان ياريت تفكر مع نفسك ثوانى....ياترى هو أنا بأهرب؟
- حتوافق...بس قلبتها نكد وكأنك داخل إمتحان وده اللى قلنا عليه فرط الإحتياطات أو الوسوسة ..عمال تقرأ جرائد ومجلات وتدور على مسابقات فى النت...يمكن سؤال منهم ييجى فى المسابقة واللا حاجة....لو حصل ده إيه رأيك تقف مع نفسك شوية كده وتقول إيه اللى أنا بأعمله ده
|
إيه اللى أنا بأعمله ده؟؟؟؟...يعنى إيه؟ يعنى تذكر توقعاتك الواقعية والتى بدأت تتعلمها مؤخراً
دى مجرد مسابقة هدفها إننا نتقابل...هم أصحابى واتجمعوا علشان ننبسط ولا حد منهم مهتم مين حيكسب أو مين حيخسر...أو مين حيجاوب ومين مش حيعرف يجاوب...وأكيد حأعرف أجاوب الأسئلة اللى حتكون فى مجال معرفتى وإهتماماتى وبعدين المسابقة دى مش علشان تقييم قدراتى وذكائى ثم إن كل واحد له نقاط ضعف ونقاط قوة
|
يااااااااه.....أنا شكلى مكبر الموضوع زيادة عن اللزوم...
فعلاً أنت مكبره...وحأقولك على حاجة جديدة تعملها....غير طريقة تصرفك المرة دى وياللا بينا نشوف إيه اللى حيحصل...إحنا توقعنا أسوأ حاجة وقلنا أسوأ حاجة إنى مش حأجاوب حاجة خالص...بس ده شغل فريق وأنا مش مسئول عن ده لوحدى وبعدين إحنا جايين ننبسط مش تقييم ولا إختبار لذكائنا وأنا ملاحظ إن أصحابى كلهم واخدين الموضوع عادى ولا حد منهم بيحضر حاجة ولا بيقرأ أى حاجة......برافو ياللا نتنقل للخطوة الجاية
تعرف على السلوك الصحيح(المرغوب):
ده السلوك الجديد المختلف اللى قررت إنك تعمله- يعنى مش حتهرب-مش حتقعد تحضر وتذاكر للمسابقة-لأ قررت تواجه الموقف وتشوف فعلاً مدى صحة توقعاتك
اسأل أصحابك وشوف كده هم بيحضروا حاجة للمسابقة دى..لو لاقيتهم بيقروا أو بيبحثوا فى حاجة معينة إعمل زيهم وإن لاقيتهم مش مهتمين ولا بيقروا حاجة إعمل زيهم...وروح المسابقة وقررإنك حتقعد لأخر المسابقة سواء جاوبت أو ما جاوبتش حاجة وجاوب على الأسئلة حتى لو شاكك إنك ممكن تكون إجابتك غلط...أصل الدنيا مش حتتهد لو جاوبت غلط وبعدين إحتمال تكون إجابتك صح
|
قيم النتائج:
إيه اللى حصل(ماذا حدث فعلياً)؟
جاوبت بعض الأسئلة اللى كانت فى مجال معرفتى-جاوبت بعض الأسئلة خطأ-بس أصحابى عملوا نفس الشئ جاوبوا أسئلة صح وأسئلة تانية جاوبوها غلط.-بس أنا لاحظت إن ما حدش منهم مهتم لما بيجاوبوا غلط بالعكس دول كانوا بيضحكوا أحياناً..أنا حاسس إنى قضيت وقت لطيف وأول مرة بأحس إنى بأعرف أنبسط زى باقى الناس-ده إتضح إنى كنت فاهم الدنيا غلط..ماحدش واخد الموضوع على أعصابه كده خالص-
|
قد إيه حاسس إنك توقعاتك السلبية كانت صح: مش حا أبالغ لو قلت صفر فى المائة
|
أى توقعات ثبت صحتها......توقعاتى الواقعية طبعاً
|
حسيت بإيه لما اتصرفت بشكل مختلف؟الموضوع كان صعب على جداً فى الأول إنى ما أحضرش ولا أقرأ حاجة وإن أجاوب حتى لو مش متأكد...حسيت بقلق جامد بس اتضح إنها مش مشكلة كبيرة إن الواحد يطلع مش عارف...المهم أنا حاسس إنى أقدر أكرر ده تانى وأدخل فى حاجة مش متأكد منها وأكتسب خبرات جديدة
|
إتعلمت إيه من الموقف ده؟...إتعلمت إزاى أتحرر من افكارى...أفكارى مش دايماً صح ونفسى أعرف أفكارى دى جت منين؟ لأنى بجد عايز أرتبط أكثر بالواقع
|
عايز تعرف أفكارك دى جت منين؟..تابع معى الجزء القادم عن التقدير السلبى للذات
|