بصوا بقي هو المفروض اصلا كنت باعمل نوع تاني خالص من المعجنات بس الجو كان حر و لقيت العجينة سايبة مش ينفع تتفرد وتتقطع ف عملتها بالطريقة دي وعجبتهم جدا فبقيت بعملها علطووووووووووول يلا تعالوا شوفوا وجربوا .....
المقادير :
خميرة بيرة او فورية
دقيق
ملح وسكر
ماء او لبن او الاتنين زي ماتحبوا
زيت
وانا ماحددتش المقادير بالضبط عشان بعملها بالتقدير كده وكل نوع دقيق بيختلف عن التاني وحسب مابلاقيها وصلت للمطلوب بسيبها
نيجي للطريقه .......
بصوا بقي هندوب الخميرة في شوية ماء دافي وعليها شوية سكر ورشة ملح يعني ونسيبها تخمر شوية او ممكن نضيف لها معلقتين دقيق ونقلب ونسيبها تخمر
لما تخمر هنلاقيها عملت زي فقاعات كده نبدا نضيف الدقيق واحده واحده ونقلب كويس
نضيف بتاع ملعقة زيت لكل كوب دقيق هنحطه ونقلب كويس لحد ماتبقي العجيبنة زي الصورة كده
نغطيها ونحطها في مكان دافي لحد ماتخمر وترفع بالشكل ده
نجيب زيت في طبق ونخلط السكر والقرفة في طبق وطبعا ندهن الصينية بالزيت عشان مايلزقش
هنحط مغرفة الايس كريم في الزيت ولو ماعندكيش استخدمي ملاعق عادية وبعدين خدي جزء من العجين ونزليه في السكر بالقرفه وقلبي كويس من كل الجهات وبعدين حطيها في الصينية
اتاكدي انك تسيبي فراغ بين كل واحده والتانية عشان بتكبر في الفرن فماتلزقش في بعضها
ممكن تضيفي رشات من القرفه فوق العجين لو حاسة انه مااخدش قرفه كفايه مع السكر
بنحطها في الفرن وعلي 200 درجه مئوية ونسيبها لحد ماتستوي بس اوعي تحرقيها بتاخد حوالي نص ساعه او اكتر حسب الحجم اللي عملتيه
بتخرجيها من الصينية اول ماتطلعيها من الفرن عشان تقدري تشيليها بسهوله اما لو سيبتيها تبرد فالسكر ممكن يلزق وتتكسر منك
بتسيبيها تبرد علي ورق فويل او مناديل المطبخ او حتي طبق بعد كده بترصيها وتقدميها
اما لو كنتي مجهزاها للشغل او للرحلات كوجبة خفيفة فبتقطعيها وترصيها في اطباق الفوم وتغلفيها بالبلاستيك وبالف هنا وشفا جربوها وبجد هتعجبكم جدا وخصوصا لو حد بيحب حاجه خفيفة مع الشاي
واستنوووووووووووووونا واكلات تانية من مطبخي