حبيبي الحزن لاقلطتك عيوني
رتب شنب ضحكتي في مجلس اهدابي
وتمرك اشجان الحنايا وافرشــ شجوني
انت المعزب وضيفك باقي اعصابي
مابعدك الا التعب واقصاك من دوني
وماقبلك الا الضغون الصبر وركابي
وهذي فراغات عيني من ورى نوني
تعرف من الصمت دمع وتسقي كتابي
والصمت عشعش على شفاهي ومكنوني
قـــام يتعرش من الحسره جذع نابي
وجريده وجهي عسيبه يــبس ومزوني
جهــــــــت قبل لاتلقــــح بكره ترابي
والشمس ترقى السمـــــا وتهل بجفوني
قطره عرق من جبين الوقت تندابي
والمغرب اللي يصب من الغسق لوني
وشلون يمحي الضــيا في لوحه غيابي
حبيبي الحزن بسولف على ظنوني
مليت اسولف على غيري وانا مابي
برد تنحنح وحيفه وارعب غصوني
واشعلت من منقد العشاق مشهابي
وكن تبغ والوجع ويكح غليوني
من مابي اللي يضيق بكثر مابـــــــي
والصبر مفتاح والضيقات صكوني
من وين بالقى الفرج لا سكروا بــــابي
مليت اجي لكـــ من الضيقه على هوني
ومليت اروح وانا اتعابي هي اتعابي
قلت اتوكا على اصحابي وهدوني
ومليت اروح وانا اتعابي هي اتعابي
عرفت ان الوجيه اشباه بعيوني
اصحاب حزني ولا لاحزاني اصحـــــابي
حبيبي الحزن تدري ويش بردوني
شئ سترته على ردونك وعرابــــــــــي
ثيـابي اول افصـالها على متوني
ومتوني اليوم افصـلهاعلى ثيابي
فهد الخرجي