أنا مش ح اكل حصو وطين.. ولا ح العن حظى مع الملايين.. ولا ح اصبر حتى مع الصابرين.. وعمرى ما اكون ولا يوم مسكين.. وح اقول للحزب الحاكم حاسب.. إذا كانت سلطة ومال ومناصب.. أنا مش عايز أى مكاسب.. بس بسببك عشت حزين.. هى الحداية تحدف كتاكيت.. واللى ح يستنى أهبل وعبيط.. ويزرع تلج هناك فى الغيط.. وإحنا سيبنالكو الإتيكيت.. واحسن أكلى طبخته بزيت.. وأنا طول اليوم شقيان تعبان.. وتعبى فى آخر اليوم بيبان.. زى الفرخة الدايخة بانام.. وتحت راسى شريط برشام.. وخيالكو بييجى كوابيس أحلام.. ونفسى أقول للحزب أنا مين.. أنا مصرى من ضمن الملايين.. ولسه فى قلبى لمصر حنين.. شايل الهم في قلبى سنين.. ميت صاحى وفيا الروح.. وجسمى مريض مليان بجروح.. علشان كده أعلنت الحرب.. يا نظام عيشنى فى طرح وضرب.. ونفسى أكون من أهل الغرب.. واعيش بكرامة لو حتى يومين.. ولا حد يبيعنى مع الملايين.