ما سألتوا صاحب النظرة الخجولة .... كيف يسهرني وله وجهٍ صبوح
كيف يظلمني وله طهر الطفولة .... كيف يفتنّي وهو دايم يروح
وكيف أنا ألقى ربيعه في فصوله .... دام كذبه صادق وصدقه مزوح
له صـفاتٍ تورد العاشق ذهوله .... مستكين صامت وكلّه جموح
أصعب الأشياء وأكثرها سهوله .... أغمض الأشياء وأكثرها وضوح
سهل تغرم به وصعب إنك تنوله .... غامضٍ طبعه وواضح في الجروح
أسعد بشوفه ولكن ما أطوله .... كنّي الوادي وهو أعـلى السفوح
يبتسم لا منهم عنّي حكوا له .... ولا حكوا لي عنه أعماقي تنوح
لي بقلبه شيٍ لكن ما يقوله .... وله بقلبي كلّ و لكنّي أبوح
كنّه الغيمه وانا أرجي هطوله .... ما نزل غيثه ولا برقه يلوح
ما عرفتوا ليش تسهرني فعوله .... وليه يسكنّي وهو دايم يروح
هو يبيني بسّ أطباعه خجوله .... وما يبيني أغفا وهو وجهه صبوح