اهلا وسهلا ..ازيكوا ياحبايبى الحلوين..الوحشين لأ..اللى بيحبونا آه ..اللى بيكرهونا لأ .
النهاردة بقى حكايتنا فى الجون ..واللى حايتكلم حاخليه يعمل 10 ضغط , المفروض تزعلوا على صاحبكم اللى كانت دُخلته امبارح , لاقيته بيتصل بيا الصبح بدرى , وبيقوللى الحقنى ياكوتش !! قولتله كوتش ايه ..انت جاى تكلمنى وسايب مراتك ؟! قاللى مراتى ايه!! ده كانت فضيحتى بجلاجل , وماعرفتش ارفع عينى قدامها , ولا قدرت ادبح القطة !! قلتله ياابنى سيبت ركبى ..ايه اللى حصل ؟ قاللى حاقولك ايه ..واعدلك ايه ..انا دخلت اوضة النوم من هنا ..وكنت حاسس انى حاكسر الاوضة على اللى فيها على راى اللمبى , ماانا محروم بقى وانت فاهم ..مراتى قدامى ..وعضلاتى معايا ..وقلت من جوايا ..ربنا يكون فى عونك يامراتى ..وياعينى على اللى حايحصلك !!
قلتله اهدى شوية ..قاللى ماهى المشكلة انى كنت هادى , ومراتى برضه قالتلى اهدى شوية ..جايز انك تعبان ..ماانت واقف على رجلك طول النهار , قال اهدى قال , ماهو المشكلة ان انا هادى ,وحسيت ان انا مش انا , قاللى هو فيه ياكوتش ؟ قلتله ..انا قلتلك من الاول حكم عقلك وماتعملش زى غيرك وتمشى ورا الدكتور , المهم يادكرى ان ده بسبب عضلة صغيرة اسمها { بى . سى } , بس سرها باتع , اول ماالدم يوصل للعضو الذكرى وينتصب , قاللى المهم ياكوتش ..عدى النقطة ديه ..قولتله..قوم بقى ايه..تقفل على البوابة على الدم اللى دخل وتمنعه من الخروج مرة تانية , لغاية ماالعضو يخلص مهمته تماما .
فلو كانت العضلة ديه كانت ضعيفة , يحصل حاجة اسمها ارتجاع وريدى ,يعنى انتصاب يبقى قوى فى الاول وبعد كده يضعف , او قوى فى الاول ثم ارتخاء مفاجئ ,او مافيش انتصاب من الاصل , قاللى والعضلات ديه كلها بتعمل ايه؟ قولتله ديه منظر يانجم , بص ياسيدى ..طبعا انت عارف كل ماتاخد منشطات اكتر ..العضلات حجمها يكبر ..تمام ..ماتردش عليا ..خلينى اكمل فى يومك الاسود ده ..قاللى هى ناقصة سواد ياكوتش ..
قولتله..وده معناه ان هرمون التستوتستيرون نسبته بترتفع فى الجسم ..وكل مايرتفع المصيبة تكبر ....ازاى ؟.....فى حاجة اسمها انزيم الاروماتى ..ده بقى بيبقى مستخبى فى الدرة ...يلزق بمستقبلات التستوتستيرون , ويقوم محوله الى استروجين !!!!! وطبعا ده هرمون الانوثة ياناصح ..والهرمون ده بيعمل حاجتين انيل من بعض ..!!
النيلة الاولانية بيعمل تدنى فى القدرة الجنسية , وديه اللى انا شرحتها دلوقتى , والنيلة التانية هى ظهور حالة التثدى ...او حلمة الكلبة , اعلان صريح انك بقيت بنت ابوها ..........
قاللى وطب الحل ايه ياكوتش ..قولتله حل لايه بالظبط ...حل للحلمة ..؟ ولا حل للتدنى ؟
وبينى وبينكم ماعرفتش اقوله ايه !! ماهى ديه مصيبة بعيد عنكم انت وهو , بس ممكن تحصل لاى واحد فيكم !! قولتله طب سيبنى دلوقتى افكر ..وحاارد عليك بعدين .مانا ماعرفتش اقوله ايه !!!
طبعا انا مش بحكيلك الحكاية ديه انت وهو ..علشان اخوفك لاسمح الله ...انا بحكيها علشان الدكتور بتاعه كان بيقول عليه ...ده ماجابيتوش ولادة !!!
ايه رايكوا بقى ! اقوله طلقها علشان مافيش حل , ولا اغير رقم تليفونى , ولاابلغ فى الدكتور , ولااقوله روح انتحر ..
بتدعى على مين انت وهو !!! هو ده بيحوأ فيه دوعا , اللى مضايقنى فى الموضوع هو البالطو الابيض , والسماعة اللى حاططها على صدره .
انتو عارفين اللى بيدن فى مالطة ...هنا بقى الوضع مختلف ,المؤذن يقول { الله اكبر }.
ومافيش حد بيصلى ...
مافيش حد عايز يسال فى حاجة ؟ ايه ده !! غريبة عمرها ماحصلت قبل كده !!
انا بينى وبينكم حتى لو حد سال ماكنتش حاارد....
اللى عايز يسال عنده " مدرب اون لاين " على الفيسبوك , يبعت سؤاله ..واحنا حانرد عليه