صباح الخير ياحبايبى الحلويين ..النهاردة بقى حانتكلم مع بعض فى موضوع مُهم !!!
أنا شايف فى وسطكوا حد غريب ..مين ده ؟آه.. أبو حقنة !إيه اللى جابك هنا ..إنت عامل زى الحرامية ,تستخبى فى الدُرة ...على العموم أنا إتعلمت من الأكبر منى إن فى العلم مافيش خيار وفاقوس !وعلشان خاطر ربنا حاخليك تسمع كلامى النهاردة ..جايز تراجع ضميرك ..قبل ماتقابل وجه كريم ..وماتعرفش تُرد لما تتسأل إنت عملت فى مخاليأ ربنا كده ليه ؟ما إنت ناقصلك بالطو أبيض وسماعة على صدرك ..وتبقى دكتور !!
وبمناسبة الحُقنة ..لأ مُش إنت .أنا حاتكلم عن حُقنة الأنسولين ,وبما إنك حاططها فى الكورس بتاع اللعيبة الغلابة ,لازم الأول نعرف هو منين بيجى الأنسولين ؟
فيه جزء فى الجسم إسمه "بنكرياس" ..أيوه ده عبارة عن غُدة ,طولها 13سم ..قول 15سم
وهى بقى مستخبية بين المعدة والطُحال ,وهى نوعين ..الأولانى غدد صماء ,والتانى غدد غير صماء ,وعلشان الدنيا ماتسحش فى بعضها ..حانتكلم النهاردة على النوع الاولانى ..
والنوع ده بقى مسئول عن إنتاج الهُرمونات اللى بتنظم الجلوكوز ..اللى هو السكر اللى فى الدم زى "الأنسولين " ماهو ده هُرمون !!وتكوينه بروتينى .....وغدد النوع الأولانى عددها 3
{ألفا -بيتا -دلتا } ,وعلشان نبسط الأمور ,حانتكلم على واحدة من التلاتة ,وهى "البيتا".
وديه بقى مسؤولة عن إفراز هرمون الأنسولين ..اللى من غيره ..الواحد منا يبقى والعياذُ بالله ..لاليه فى الطور ولافى الطحين !! وكمية الأكل بتاعتك إنت وهو ,هى إللى بينتُج عنها خروج الجلوكوز فى الدم ..وده اللى بيحدد درجة نشاط البيتا ..يعنى يُخرج قد إيه أنسولين ؟
اللى هو بياخد الجلوكوز ويدخله جوه الخلايا .
قوم إيه ياعم ..لما الدُكتور يدى كورس مُنشطات ..ماهو الغلط مش عليه ..الغلط على اللى سلملُه دقنه ,ماهو لازم يديلوا حقنة أنسولين ,ماهو فى الحتة ديه ذكى جداً ..ماهو عارف إن خلايا بيتا مابتحبش حد يدخُل فى شُغلها ,فلما المُنشط يدخل جسم المريض ..معلش قصدى اللاعب المريض ..يووه..المُهم ..بيقلل الأول شُغل البنكرياس وبعد كده يوقف شغله تماماً !!ويبوظ خلايا بيتا ..وإنتاج الأنسولين يوقف ..وعلى فكرة ..هو ده مرض السُكر !!!
حسبى الله ..المُشكلة إنه فاهم ..إن هو فاهم .ماهو الشيطان عاملها معاه!!
ماهو بينى وبينك إنت وهو ..الغلط على اللاعب ..قبل مايسلم نفسُه لحد يعرف هو مين فى الأصل ؟ودارس إيه ؟ ايوه قصدى إيدى العيش لخبازه !!على العُموم الغلطة مش غلطتُه, ولا غلطة اللى سلملُه دقنُه ..ديه غلطتى أنا ..إنى بتكلم عليه ,وهو مايستهلش ..إنما اللى صعبان عليا هما اللى لسه ماوقعوش تحت إيدُه !! نرجع لمرجوعنا ..لو صاحبنا فى سن العشرين يبقى ده النوع الأولانى من السُكرى ,إدينى ودنك إنت وهو لأن اللى حاقوله مُهم ..وده اللى فيه الخُلاصة ..لما البيتا توقف عن شُغلها تقدر تقول إنها عاملة زى الأُوضة الضلمة ,..وفيه خلايا إسمها {t} ...وديه بقى بتبقى مستخبية فى الدُرة ..لأ ده غير الحرامى ,اللى عامل فيها دُكتور ,والخلايا ديه من الجهاز المناعى بتاع الجسم اللى بيدافع عنُه,وأصلها غبية ,حاتفتكر إن خلايا بيتا حاجة غريبة عن الجسم ,تقوم شَدة حيلها ..وتسن سنانها وتهاجمها وتدمرها ..وتخليها حتت !!وطبعاً مابقاش فيها بيتا ..ولاأنسولين ..ولما صاحبنا الدُكتور يجى يوقف كورس المُنشطات ..وطبعاً الجسم مابقاش يفرز أنسولين ..تفتكروا ساعتها يحصل إيه ؟يبقى صاحبنا عندُه سُكر .ومايقدرش يستغنى عن حُقنة النسولين ,ده غير بقى مالشحم حايملى جسمُه ..ماهو الأنسولين كان ليه شُغلانة تانية ,وهى تشجيع الدهون اللى بتعوم فى الدم ,ويدخلها خوه الأنسجة الشحمية
يبقى كده بتكلم عن إرتفاع الدهون الثلاثية فى الدم ...وطبعاً ضيق وإنسداد فى الشرايين ..خصوصاً بتاعة القلب ...ماهو كان بيوسع الشرايين ...وإلتهاب فى الأعصاب خصوصاً فى صوابع الأيد والرجلين ...وشوية مية زرقا على العين !!
بقولك إيه ياعم الدكتور ..بجد منك لله ..حاتقول لربنا إيه لما يسألك عملت كده ليه..هو الواد اللى ضربك على إيدك ؟ ولا إنت اللى قعدت تزن عليه !!!وعلى فكرة ..اوعى تصدق إنك دُكتور !!!!