قصيدة فرحة العيد
قالت جديدك قلتنا مابه اجديد
اصلاٍ جديدي فيك ماهو جديدي
قالت بشان العيد قلت الله يعيد
فرحة لقانا يالغزال الفريدي
للعيد فرحه وانت لي فرحة العيد
ياعيدي اللي فيك يحلو عيدي
انتي جمال العيد ياشيخة الغيد
وانتي بعد للزين عمٍ وسيدي
وانتي بعد عيدي لياجبتنا العيد
عيدي معك عيدين شيٍ وكيدي
والعيد الاخر يالغلا سجة البيد
في خايعٍ قفرٍ مكانه بعيدي
في خايعٍ مادوجوبه مقاريد
فيه الخزامى والنفل والزبيدي
من كبر نبته ماتشوف المفاريد
ولاداجه الشاوي نزول وشديدي
ولاجاه عساسٍ حدور ومسانيد
ولاطبه الا مسبتات الحديدي
VXR اسبير زين التجاعيد
غرنوق توه من الوكاله جديدي
فوقه صبيٍ يعرف الخد ويجيد
جزاع بتاعٍ ورايه سديدي
وخوة نشاما تنفع الروح وتزيد
في عمر راعيها وربي شهيدي
وياماحلا لمن تلا فو على الصيد
والكل منهم فك طيره يصيدي
هذي مطايرٍ وهذي ملابيد
واللي تروح طيار (سلطان) بيدي
يطلع وعنها كنه يميل ويحيد
مرهي بها طيري واعرفه عنيدي
وكل على سلطان يثني التماجيد
حتى يتعلاها وتنزل هميدي
تقول كنه يعرف بعض المناقيد
وكنه يقول ابشر بها ياعضيدي
وبعد المضحى والقنص كلٍ يشيد
ويقول طيري فارقٍ بالمصيدي
نرجع ونشرب من دلالٍ مقانيد
هاذي بها هيلٍ وهاذي عويدي
هي غايتي بالذات ياتعلة الجيد
خوة نشاما في حياتي رصيدي
وختامها يالله عسى عيديك سعيد
ياللي اثرتي هاجسي في قصيدي