يفيض البوح من نبع الغلا أبيات موزونه وتنبت في ضفاف الشعر لك يا فاتنه أزهار
وتقبل هالقوافي لك مشاعر شوق مجنونه أنا شاعر وكل عمري نزفته في هواك أشعار
سلام الشوق يا ساره وقلبك عاد وشلونه؟ عسى باقي على عهدي ، وشايل للهوى تذكار
أحبك والغلا يصعب علينا نعيش من دونه ولكن هو كذا حظي ، وهذي حكمة الأقدار
تفارقنا وكل(ن) راح في دنياه وشؤونه ذبل حلم القلوب اللي بكت في آخر المشوار
أنا ماجيتلك لايم ، ولو هالروح مطعونه أنا جيت أرتوي من رقتك وأرحل شخص منهار
عسى يرتاح تفكيرك من الهوجاس وظنونه وعسى ألقى سبب واحد يبرّد حرّة المحتار
هذاك اللي يبان الحب والحرمان ف عيونه وقف مذهول في صمته ، يدوّر للفراق أعذار
نعم يا ساره إحساسك ، خفوقي لازم إيصونه أموت العاشق الوافي ، ولا أحيا الغبي الغدّار
أبرحل والألم يذبح أحاسيسي على هونه إلى وين السفر ياللي مفارق في جفاها دار؟
وش الديره سوى محبوب يحطّك داخل جفونه و ساره هي وطن قلبي وغيبتها عذاب ونار
يعين الله من فارق حبيب وفاضت شجونه على شاطي الألم يجلس ، يبعثر أطهر الأسرار
إلى ساره رحل قلبي وخلّى ناسه وكونه رسم رقة ملامحها ، على كف الغلا أقمار
هذيك اللي تهادت في خيالي بنت مزيونه تجي وتروح في بالي وصارت تملك الأفكار
من الرقه أدلّعها إذا ناديت زيتونه دلوعيّه كذا خلقه ، نقيّه تشبه الأمطار
ولو تطلق شفايفها أسر بسمات مسجونه من الروعه ، عسى يستر علينا ربي الستّار
يذوب الورد في لحظه ، ويتبرّا من غصونه وتصبح كل صحرا في ثواني غابه وأشجار
خذت من ريحة النرجس ومن وجه القمر لونه ولامنها مشت تسحر قلوب وتسلب الأنظار
وتتبعها مثل طفل(ن) يلاحق خيط بالونه ولايقدر يلامسها..كذا ساره ..حسن جبّار
كثير قلوب في صفوة حلاها حيل مفتونه ولكن ماقدر يوصل موانيها سوى البحّار
هذاك اللي يبان الحب والحرمان فـ عيونه وقف مذهول في صمته ، يدوّر للفراق أعذار
تفارقنا وكل(ن) راح في دنياه وشؤونه ذبل حلم القلوب ، اللي بكت في آخر المشوار