لو كنت رومانسي حالم عاطفي وعايش في عالم تاني مش في الواقع أساسا، يبقى انت كدة على مشارف صدمة كبيرة في الحب، ودا عشان صورة الحياة العاطفية إللي انت راسمها مع شريكة الحياة أكيد ملهاش علاقة باللي هيحصل خالص.
فأنت تشاهد الأفلام الأجنبية مثل you have got mail وترى ميج رايان وتوم هانكس يتجولان في الأسواق بكل حرية وبيشتروا تفحاية واحدة وبياكلوها مع بعض، بزمتك انت تقدر تخش سوق في مصر مع واحدة شبه ميج رايان، ولا مثلا لو قلت للبياع أنا عايز تفحاية واحدة، يا ترى هيرد يقولك إيه إنت وصديقتك وعيلتك كلها.
ومثلا لما ميج رايان تعبت وجالها برد، طبعا إنت فاكر إن كل واحدة هيجيلها برد هتبقى عاملة زي ميج رايان لما كانت نايمة زي القمر على السرير ولابسة بيجامة آخر شياكة، لكن لما هتتجوز يا حلو انسى الصورة دي خالص مع أي واحدة مصرية حتى لو كانت هاي كلاس، لأن طبعا هتلاقيها لفة راسها بفوطة وعمالة تتشحتف وتعيط وتقول مصدعة، ولما تطلب منها أي حاجة نفسك فيها هتقولك "هو ده وقته يا منيل".
عزيزي الرومانسي .. دي مش دعوة عشان تترك رومانسيتك، ولكن إللي هتتجوزها هتكون بعيدة تماما عن الأفلام العربية والأجنبية والصور الخيالية إللي في دماغك، فلا تصطدم إذا تزوجت واحدة من البشر، ولا تصدق خالد سليم حين قال "انت أكيد من عالم تاني"، فهو يقصد عالم سمسم على أحسن تقدير.