هذه القصيدة للشاعرٍمحمد العبد الله العوني عندما تخلى عنه الجميع ، وهجره الناس إذ كان رهين السجن
فقد سجن على عهد الملك عبدالعزيز رحمه الله في الاحساء وقيل انه سجن في بئر
في الاحساء
لكن ذلك لم يزعزع إيمانه بربه الواحد الأحد
وفي قصيدته هذا يتجلى توحيده لله ، حيث لا يهمه أن يقاطعه الناس مادام متمسكاً بحبل الله كما قال ( متجود بحبال منشي المخيلة )
والمخيلة أي : السحاب ، إنه رجل لم يدرس في المدارس والجامعات لكنه كان نتاجاً للدعوة الصادقة إلى التوحيد في جزيرة العرب
هذه القصيدة الذي كان صادقاً في لجوئه إلى الله فاكتسبت قصيدته تلك الشهرة...
علما بان القصيدة نزلت على شريط كسيت ولكنها منعت بعد نزولها بقليل
وهذي هي القصيدة مكتوبة
يالله يا والي علـى كـل والـي =ياخير من يدعى لكشف الجليلـه
المالك المعبود محصي الرمالـي =الكون والدنيا وما به فهـي لـه
ما كان له أول ومـا كـان تالـي = ملكه يدبر به على ما يبـي لـه
يقضي ويمضي قادرٍ مـا يبالـي = والخلق ما تفعل بلا امره فعيلـه
ماله شريك جـل فـوق متعالـي = علمـه أحـاط بدقهـا والجليـه
أشهد فلا غيـره آلـه ولا لـي = ربٍسواه أخشاه وأرجـي لنيلـه
ياواحدٍ فـوق السمـوات عالـي = من سطوته كل الخلايـق ذليلـه
يا فارج الشدة بضيـق الحوالـي =افـرج لعبـدك يامنجـي خليلـه
وانظر بعينك يـا آلهـي الحالـي =فردٍ غريـبٍ والمصاغـي قليلـه
وحيد مالي غيـر ظلـك أظلالـي =ذليل مالي غيـر عـزك وسيلـه
ياراحم ارحم شيبتـي وانخذالـي = ياجابر اجبر عثرتـي والفشيلـه
والطف وناظر ياالولي في سوالي =لا تواخذان فيما مضى من فعيلـه
لا إخوان لا عمان لا من خوالـي = ولا من صديقٍ بالوزى نشتكي له
لو كان ما يجلي سوى الله جالـي = ماشفت عبدٍ هرجته لـي جميلـه
تقطعـت وذم العْـرى والمدالـي =من جملة الخـلان والمستخيلـه
قضيت من المخلوق ماحدٍ بقالـي =إلا أنت ياللي ما يخلـي عميلـه
عادوني كل الناس شرق وشمالي = ولا بقى غيرك ذراً نلتجـي لـه
شافوني مذلـولٍ وحيـدٍ وخالـي =والا لي من الفزعات مومي شليله
وأنا بعـون الله امتـانٍ احبالـي = متجودٍ بحبـال منشـي المخيلـه
لو كان كلٍ لـه صديـقٍ مْوالـي =أخـوال واقـرابٍ ولحـدٍ قبيلـه
أنا لي اللي زابنـه مـا يسالـي = جزل العطا مبري الجسوم العليله
وليـا تنـادوا بينهـم للنوالـي =ناديت بإسمك يامنشـي المخيلـه
من لاذ بك ما صار بالضيق تالي =يصير الأول لو اعظامـه هزيلـه
أنا دخيلك يـا عزيـز الجلالـي =حاشا كرم جودك يضيـع عميلـه
بريت من غيرك بحالـي ومالـي =وزبنت أنا بحماك عن كل ميلـه
من شر خلقك لايذٍ بـك ومالـي = غيرك ملاذٍ شامـخٍ ينعنـي لـه
يارب مالي غير جـدواك وإلـي = وإن كان خليتن فلا لـي عقيلـه
ياعالمٍ بـا المخطيـه والعدالـي= تشوف مالي غير عدلك وسيلـه
فـلا تؤاخذنـي بماضـي فعالـي =يا ساتر العورات مضفي الجميله
لو كان ذنبـي راجـحٍ بالجبالـي =عفوك عظيم ليس ذنبـي عديلـه
أطلبك تقبل توبتي عـن خمالـي = وأطلبك عني كـل كـربٍ تزيلـه
وأطلبك تغفر لي وتصلح أعمالـي = يا مزبن الخايف إلى بـاد حيْلـه
مولاي لا ملجـأ ولا ملتجـأ لـي = إلا أنت ياللي ما يضيـع نزيلـه
يا فزعة المضيوم منشي الخيالي = يا فارج الشـدات لوهـي ثقيلـه
أفرج لمن بالحبس دونه أرجالـي= ابواب واقفـال حصـونٍ ثقيلـه
في وسط دبـابٍ وحيـدٍ الحالـي= أظلم ولا أدري وش نهاره وليلـه
متروك مالي من يـرد المقالـي= لا أحد يبي قولي ولا أحدٍ يشيلـه
ولا أحد غيـرك عليـه اتكالـي = إلا أنت يامنجي دريـك الدبيلـه
ما دام تنظرني وتسمـع مقالـي = ما خاب عبدٍ يدري أنـك وكيلـه
يا سامعٍ بالليـل حـس النمالـي =وصوت يونس في البحور الطويله
دعاء وضرب الموج مثل الجبالي = فوقه أجيبـت دعوتـه وتْهليلـه
يا مصرف الأيام هـي والليالـي = في قولته كن يجري القلم بتعديله
أدعوك بأسماك العظام الجزالـي = وبحق ما خصيت لك من فضيلـه
وبحق عظمة قدرتـك والجلالـي= وبحق نورك والأفعـال الجميلـه
وبحـق مـا نزلـت أول وتالـي = تجيرني من شر خلقـك طويلـه
وتزيـل كربـاتٍ علينـا اثقالـي = تغطلست مالي سـوى الله دليلـه
أمن على قلبٍ يجـول اجتوالـي = يامسكّن الروعات سكّـن جفيلـه
اسرع علينا يا قريـب النوالـي= لا تجعل الشـده علينـا طويلـه
يا فارج الكربه بضيـق الحوالـي = أومر العبـدك بالفـرج وتْعجيلـه
واجل الأمور المعظله والجلالـي = عن كل عبدٍ مسلـمٍ يندعـي لـه
صلاة ربي عـد رمـل السهالـي = علـى نبـيٍ وضّـح الله دليلـه
صفوة قريش اللي مشى بالعدالي = نبينا المعصوم عـن كـل ميلـه
تمت وفرّجهـا عزيـز الجلالـي = فرحت بالطارش وقمت ادعي لـه