لو كانت بشرتك عادية فأنتِ محظوظة أوي؛ وده لأن البشرة العادية دايماً ناعمة ونقية، وما فيهاش أي شوائب أو حبوب أو جفاف ولا بقع في الجلد، وكمان ما فيهاش أي مسام دهنية ظاهرة،
وعلشان تقدري تحافظي عليها يبقى لازم تهتمي بيها مِن خلال مجموعة النقاط الآتية...
1- تنظيفها يومياً
لازم تنظّفيها كل يوم كويس؛ وده لأن البشرة العادية بتميل للجفاف عند التقدّم في السن، كمان ممكن يسبب الإهمال وعدم الاهتمام بالبشرة ظهور التجاعيد المبكرة عند سن 30 أو 40 سنة، وممكن يصيب البشرة بقع حوالين العين والفم والذقن؛ بسبب عوامل الجو زي البرد والحر.. علشان كده دايما بانصح البنت اللي بشرتها عادية إنها تهتم بيها وتنظّفها يوميا؛ لأن تنظيف البشرة له دور أساسي في مكافحة ظهور التجاعيد مبكراً، وكمان الكريمات المرطبة بتساعد على تـأخر الشيخوخة.
ولو كنتِ عايزة تحافظي عليها من إنها تتحول لبشرة جافة، يبقى لازم تغسليها مرة أو مرتين في اليوم.
2- استخدمي مزيل الماكياج
يُفضل إنك تستخدمي مزيل الماكياج الكريمي؛ للتخلّص من أي ماكياج موجود علي البشرة، وبعد كده حطي كريمات مغذية للبشرة يكون فيها فيتامينات.
3- اعملي غسول طبيعي
لو بشرتك عادية يبقى يا ريت إنك تغسليها مرتين أو ثلاثة في الأسبوع بغسول من مكوّنات طبيعية، وده غسول طبيعي ممكن إنك تعمليه بنفسك في البيت وتستخدميه.
غسول زهرة البابونج
المكوّنات:
• 100 جم زهرة البابونج.
• لتر ماء.
الطريقة:
تغلي زهرة البابونج مع الماء وبعد كده تحطيها في الثلاجة، ممكن تغسلي بشرتك بالغسول ده مرتين أو ثلاثة في الأسبوع.
4- اعملي ماسكات طبيعية
يا ريت كمان إنك تعملي ماسك طبيعي لبشرتك مرة واحدة في الأسبوع علشان تنقيها من أي شوائب ممكن أنها تتجمع عليها نتيجة التلوث الموجود في الهواء وده ماسك ممكن إنك تعمليه..
ماسك اللبن
المكوّنات:
• 5 معالق لبن حليب.
• 5 معالق عسل نحل.
الطريقة:
ضعي العسل على اللبن، لغاية ما يصبحوا مزيج واحد، وبعد كده هاتي قطنة وبليها باللبن والعسل ومرريها على بشرتك مرتين، سيبي اللبن والعسل على بشرتك لمدة 10 دقائق علشان بشرتك تتشربهم كويس، بعد كده اغسلي وجهك بالمياه الفاترة.