أشرب من إيدي المرّ لوْ كان شهد وعسل
ليه أشربُه
أشرب من إيديكي الصبر لو كان هوه الأمل
لأ ما أشربُه
لوْ كان حصان الحزن فارس زماني
ليه أركبُه
لو كان كتاب الفرْح ح يغيّر زماني
أيوه أسرقُه
باخلع هدوم الحزن من بدري
والبس هدوم الفرح مع بدري
واخاف أنام في بيوت ..
لو حزن فيها أموت
و .. أضيع
قبل ما يطلع ع المدن بدري
يعرفني .. يصاحبني
يغيّرني .. يجنّني
أيوه .. أصحبُه
و .. أشرب من إيديكي المرّ .. لوْ كان شهد وعسل
ليه .. أشربُه