إذا ناوي على هجري ، نصيحه لاتسويها أنا من أركب عنادي ، أخرّبها..أخربها
بزلزلها على راسك وأجيب أعلاها واطيها وأخلي دمعة عيونك أسيره في لهايبها
أنا ماني جبان ، وكلمة المنطق أبدّيها وأكاذيب الحكي جدام صاحبها أكذّبها
أجي واثق ولا أندم على حاجه أسويها ولا ألعب أبد لعبه ، إذا ماكنت كاسبها
ولو ه الدنيا تتحدى ، أنا أقبل تحدّيها بسيّرها على كيفي ، وألاعبها وأدعابها
نعم أقدر على كيفي ورغباتي أمشّيها حشى ماتلوي ذراعي ، وربي راح أغلّبها
ولو زادت مصايبها وغثتني بلاويها أنا ماتقهر إحساسي بلاويها ومصايبها
أبد لاتتبع ظنونك وتغرق في أمانيها قبل لا تركب براسك ، تعوّذ منها وإركبها
تعال وشوف بعيونك قبل لا الشك يعميها وش مسوي غرامك في أحاسيس(ن) معذّبها
عطيتك بالوفا قلبي وهذي عاد تاليها تبي تبعد وتتركني ، وعشرتنا تجنّبها
كثير قلوب أهدتني قبل قلبك تجافيها ولا أثّر تجافيها على قلب(ن) مذوّبها
عيوني ماهي اللي تنتحب لاراح غاليها وأوجاعي ترى صدك ، حبيبي ماهو أصعبها
على كثر الجروح اللي تجي منك وأعدّيها أبي تجلس مع إحساسك وتذكرها وتحسبها
بعدها لو تبي تهجر ، عليك الله سوّيها مدامك راكب عنادك ، أنا ناوي أخرّبها