يعنى إيه مواقف الخطورة وإحنا بنتكلم عن ضعف الثقة بالنفس؟....مواقف الخطورة هى المواقف اللى ممكن تسبب تنشيط لضعف الثقة بالنفس الكامن فى عقلك الباطن؟...يعنى إيه الكلام ده؟ يعنى إحنا اتفقنا إن كل الناس ممكن تكون شايفة ضعف ثقتك بنفسك وأنت الوحيد اللى مش شايف ده...إزاى؟ من خلال الإفتراضات والقواعد الصارمة اللى وضعتها لنفسك واللى صورت لك إنك تمام وإن كل حاجة ممكن تعملها صح 100% من غير أخطاء وإنك عمرك ما حتزعل حد وإنك....بس الحياة مليئة بالمواقف اللى ممكن تلاقى فيها هذه الفروض والقواعد لاتجدى نفعاً...يعنى موقف جديد مضطر إنك تواجهه...مش حتعرف تهرب منه...ومش حينفع فيه تقول مثلاً مش حا أقول رأيى...أو إنك بتدخل فى خبرة عمل أو دراسة جديدة لم يكن لك فيها خبرات أو تجارب سابقة ولازم تعملها وإلا مثلاً حتخسر شغلك....فجأة لأول مرة بتشوف إنك مش حتقدر تعمل الحاجة الجديدة دى صح 100% لأنك لم يكن لك خبرة سابقة بها...دلوقت أنت حاسس إن اللى حواليك لازم يساعدوك...يبقى الإحساس الكامن بإنك غير كفء حيطلع على السطح من عقلك الباطن....وتبدأ معاه شوية مشاعر سلبية مصاحبة زى الإحباط والشعور بالنقص والدونية والخجل من نفسك ده غير حالة القلق اللى ممكن تتضح فى شكل أعراض جسمانية كل ما حتبدأ فى الحاجة الجديدة اللى بتعملها زى ألام البطن والرغبة فى القئ وفقدان الشهية أو اضطراب ضربات القلب وسرعة التنفس...الخ وهنا ممكن يحصل حاجة من ثلاثة...إنك تختار الهروب وتبرر لنفسك الهروب ده بأى مبرر زى مثلاً إن الشغل ده ما بقاش ينفعك أو الحاجات الجديدة اللى بيعملوها فى الشغل ده مالهاش لزمة...أى مبرر المهم تهرب وترجع مفاهيم و مشاعر الدونية فى أعماق العقل الباطن مرة ثانية لأنك مش بتستحمل ومش قادر تشوف نفس كده... أو إنك تبالغ فى الإستعداد ووضع الإحتياطات لدرجة الوسوسة.. أو إنك ربنا يهديك وتقرر تعيش الخبرة الشعورية المؤلمة لتدنى الثقة بالنفس حتى ولو وصلت لاكتئاب....مش مهم لأن ده حيكون أول الخيط اللى حنبدأ تختبر به مدى صحة مفاهيم السلبية حول ذاتك حتى يمكن تعديل هذه المفاهيم.....
وياريت دلوقت نعصف أذهاننا مع بعض ونفكر كويس ونفتكر:
أنا فاكر فى موقف حصل وكنت خايف من إنى أفشل وساعتها اتصرفت بالطريقة دى
..............................................................................................
أنا فعلاً مش واثق من نفسى وعلشان كده هربت كتير فى المواقف دى:
......................................................................................
أنا دايماً بأخاف من أى خبرات جديدة فى العمل أو فى الحياة الإجتماعية وعلشان كده بأتصرف بالشكل ده فى المواقف دى:
......................................................................................................................................
ونلتقى بإذن الله فى السلوكيات المحتملة لمواجهة مواقف الخطورة
د.نهلة نور الدين حافظ
أخصائى الطب النفسى