أنهارده هقولكوا على وصفه للتونه الجاهزه اللى بنشتريها من السوبر ماركت فى علب بس المره دى انا عملتها فى البيت وطلعت هايله قلت أقول لحبيباتى الفتوكات عليها.. المقادير سمكه تونه من السوبر ماركت ودى صورتها وكان وزنها 1750 جم طبعا هنغسل السمكه كويس بعد تنظيفها وأفتحها للأخر وأنزع منها سلسلة الظهر بتاعة الشوك وهتطلع بسهوله وهقطعها فصوص كبيره ودى صورتها وهى لونها زى اللحمه غامق كده بس ما تقلقيش من اللون بعد السليق بتفتح خالص . وطبعا تبلتها بالثوم والليمون وكمون وملح وفلفل وتركتها .. وبعدين حطيت حله على النار به ماء وجزر وليمون وكمون وبصل وورق لورا و ملعقة خل وعلى النار لغاية ما يغلى وبعدين أضع السمك المتبل بهذا الماء المغلى وأتركها حوالى ساعه وما تقلقيش من طول المده لان السمكه تبدو طريه بس لما تحطيها تسلق بتشد شويه لانها شبه اللحمه زى ما قلت قبل كده وبعدين نطفىء النار ونصفيها فى مصفه وهتشوفى لونها دلوقتى.. معلش الصور مش واضحه قوى بس صورتهالك تانى بعد ما فصصته فصوص متوسطة الحجم شوفتى اللون تفتح ازاى وبعدين أعمل الصوص عباره عن رأس ثوم وأدقها بملح وكمون ---- وحوالى نصف كوب زيت ---- وربع كوب خل ---- عصير ثلاث ليمونات وأضع كل مقادير الصوص على النار وأضع فيها فصوص السمك وأتركها تغلى مدة عشر دقائق لتتشرب جزء من الصوص وبس كده خلاص أتركه يبرد . وبعدين ممكن أضعه فى علب فى الثلاجه لحين الاستعمال...ولو الصوص قليل أزود شوية زيت على وجهه للحفظ . ودى صورته فى الصوص ممكن أضافة فلفله حاره حسب الرغبه مدقوقه مع الثوم للى بيحب التونه الحاره وشوية طحينه ورغيف وأوعى وشك ...روعه جميله جدا ... أهى تنفع فى الثلاجه عشاء أو غداء فى يوم تكسلى تطبخى تسحبى منها ... حبيباتى الفتوكاتى ليا عندكم طلب لو عجبتكم الوصفه لا تنسوا التقييم ولو كلمه واحده قليله تنفع فى مواضيع كتيره يبقى كتر خيركم أحسن جوزى زلنى عقبال ما صورلى السمكه بس عشان ايدى زفره ومش عارفه أصور وقعد ينبط فيا ويقول كل حاجه تقولى عليها فى فتكات خلاص مفيش أسرار هههههههه وانا أقله معلشى أصلى بحبهم وأعتبرهم أهلى وأصحابى ...أوعوا تكسفونى قدامه ...بحبكم كلكم ..