يعيش ما يقرب من 80 ألف نسمة بقري نواي وابشادات والشماس وجعاوير بمركز ملوي تحت خط الفقر طبقا لتقرير التنمية البشرية لعام 2009 والذي صنف 16 قرية بالمنيا تعيش أسرها بدخل أقل من جنيهين يوميا فهذه القري تعيش دون مياه شرب نقية ومنازل حجرة واحة مبنية بالطوب اللبن ولا توجد مدارس تعليمية أو وحدات صحية وارتفعت نسبة البطالة بهذه القري لتصل إلي ما يزيد علي 90% فكيف تعيش الاسرة الفقيرة المصرية بأقل من جنيهين يوميا؟
وتسكن في حجرة واحدة هي وأبناؤها بلا مياه أو كهرباء ولا تستطيع الحصول علي الخبز إلا بمعاناة ومن الطبيعي أن التعليم هو آخر ما يخطر ببال رب الأسرة فكل همه كيف يستطيع تدبير احتياجات الأسرة من الطعام والشراب طوال اليوم.
كثيرا ما ترددت الأقوال عن رغبة النظام السابق في مشروع قومي يلتف حوله الناس تاركا معاناة ما يقرب من ألف قرية علي مستوي الجمهورية تعيش تحت خط الفقر وسؤالي الآن هل يوجد مشروع أحق من هؤلاء؟
فهؤلاء الذين سنروي قصصهم مصريون يعيشون معنا تحت نفس السماء وهم: مسئوليتنا جميعا وهذه بعض القصص من قري نواي الشماس وابشادات وجعاوير.
< ربيع علي مدير مركز معلومات بنواي – تعداد قري نواي 16475 نسمة ولدينا مستودع أنابيب واحد يضم 4 قري وحصتنا منه 450 أنبوبة لا تكفي عدد السكان وكذلك الخبز حصتنا 33 شوال دقيق لا تكفي عدد سكان القرية.
< عزة قعود سالم قرية نواي - بيتنا سقفه وقع من المطرة ونحن 9 أفراد وكلنا بنتغطي ببطانيتين بس ولا نملك حتي نعيد بناء السقف وأبي يعمل بـ 10 جنيهات في اليوم لا يكفونا ونحن الحريم نصنع مكانس ونبيعها واللحمة لا نراها إلا نادرا معانا فلوس بنجيب مش معانا بناكل بعيش وجبنة أو باذنجان.
< سيدة حسن علي قرية نواي – عندي 9 عيال وكل اللي نفسي فيه ابني حجرة تاني علشان نعرف نعيش أنا وجوزي وعيالي الصغيرين بننام مع بعض وعيالي الكبار 6 بنات بيناموا مع بعض وأنا زوجي أجير بيشتغل بـ 15 جنيهاً في اليوم وبيشتغل يوم ويومين لا والحمد لله علي كل حال.
< محمود طارق طفل 11 سنة قري نواي - مفيش اهتمام ببلدنا هنا خالص دي بلد معدومة في المحافظة ومفيش أي اهتمام بالأسر المحتاجة وعايز أقول للمحافظ تعالي الحقنا من اللي احنا فيه المرض انتشر في البلد من المية الوحشة وقلة الأكل.
< عم شعبان سائق قري نواي – لدي 9 عيال وأمي المريضة تعيش معنا وكلنا نعيش في حجرتين ليس بهما أي إضاءة ولا حتي لمبة ومن غير حمام الشباب بيروحوا الجامع والبنات بيروحوا عند الجيران ومفيش مية بنملي من الجيران وأنا يوميتي لما باشتغل كويس مش بتزيد علي 12 جنيهاً يعني العيل مش بيحصله جنيه في اليوم معيشة.
< الحاج ثابت قرية نواي – أنا مسئول عن الجامع اللي هنا والجامع ده بقاله سنة الحيطان بتاعته اتشققت ومحدش بيصلي فيه علشان خايفين أحسن يوقع علينا وجم مهندسين يشوفوا علشان يتصلح ومحدش بيرجع تاني.
< فتحي جابر قرية نواي – أنا سواق وعندي مشكلة أن الرخصة زادت من 80 جنيهاً إلي 600 جنيه مرة واحدة وأنا رخصتي منتهية منذ شهر ولم أجددها لأني مش معايا فلوس علشان أدفع 600 جنيه السؤال اللي باساله ليه زادت الزيادة الضخمة دي مرة واحدة من 80 جنيهاً لـ 600 جنيه.
< مصطفي صادق عزبة الشماس تابعة لقرية نواي – احنا بنعاني معاناة تامة في العزبة مش بيوصلنا أي حاج الطريق بتاعنا لسه مش معمول والمجلس المحلي لقري نواي بيلقي بالقمامة علي طريقنا ومدير مجلس محلي للقري لم يزر الشماس منذ أن تم تعيينه وعندنا مشكلة كبيرة في العيش أننا بنروح نجيب العيش من قرية الأشمونين ولما طالبنا أن يكون لينا حصة من الدقيق تبعث إلي نواي ويكون العيش الخاص بينا يخبز في قرية نواي لم يستجيب لنا أحد وطالبنا بذلك منذ أيام أحمد ضيا الدين وقدمنا شكاوي كتير بدون إجابة.
< منصور عبد السيد عزب الشماس – احنا هنا محرومين من كل حاجة مفيش وحد صحية ومفيش مدارس، العيل لما بيروح المدرس لازم يمشي 4 كيلو الصبح وبعد الضهر علشان ينزل نواي ومفيش مواصلة وكمان في مشكلة في السكن جميع القري اللي حوالينا دخلها كردون مباني ما عدا عزبة الشماس من سنة 1952 وعددنا بيزيد والأرض زي ما هي ولا في حد بيسأل فينا خالص إحنا هنا معدومين والطريق فيه 45 كشافاً مقطوع النور بتاعها وروحنا لمجلس القري أكتر من مرة علشان يوصلها النور ولم يستجيب وإحنا هنا معزولين حتي مفيش غفير ومحدش بيسأل فينا فياريت المحافظ ييجي يسأل فينا ويعبرنا ويعملنا سكن زي باقي البلاد احنا محاوطنا اكتر من فدان ونص فاضي بس محدش راضي يديهولنا ياريت حد ييجي يشوف حالنا علي الطبيعة.
< ربيعة عيسي عزب الشماس – أرملة ومعايا 5 عيال ومعنديش أي حاجة غير فضل ربنا وحجرة واحدة بس لينا إحنا الـ 6 وباخد 80 جنيهاً في الشهر ومش قادرين نعيش وكل اللي نفسي فيه حتة بس تتبني توسع علينا.
< نجاح جميل عبد الحكم عزبة الشماس –جوزي شغال خفير ومرتبه علي قدنا ومعانا 4 عيال وعايشي في حجرة واحدة من غير حمام ولا مية ولا نور وادي عيشتنا والحمد لله عايشين زينا زي الناس.
< محمد فتحي جلال عزب الشماس – عندي إعاقة في الساق اليمني وعندي طفل 3 سنوات عنده ثقب في القلب ومرتبي 220 جنيهاً مش بيكفونا لا معيشة ولا علاج وأمي عيانة وعايشة معايا وأنا قاعد في أوضة واحدة.
< وردة إبراهيم عزبة الشماس – عندي 6 عيال وجوزي معوق وفي ناس بتحن علينا وتساعدنا علشان نجيب مصاريف للعيال وعايشين من قلوب الناس الرحيمة وعندنا أوضة واحدة بننام فيها كلنا فوق بعض وحتي حجرة دي بنيناها من المساعدات إحنا بس مش عايزين غير سكن كويس نعيش فيه.
< الحاج حسن عمدة ابشادات – القرية هنا تعدادها 30 ألف نسمة وأكبر مشكلة عندنا إن فيه متعلمين كتير بس مفيش أي شغل خالص ولا مصانع ولا أي حاجة فنسبة البطالة في البلد هنا عالية جدا جدا.
< سعد تميم شيخ بلد جعاوير – معندناش وحدة صحية والمسافة بينا وبين ابشادات 7 كيلو والمواصلات صعبة علي الناس فإحنا بنطالب بعمل وحدة صحية لينا.
< تفاحة عيسي عزبة جعوير- جوزي مش بيشوف ومعايا واد وبت والمعاش 140 جنيهاً ومش بيكفوا اي حاجة واحنا عايشين من فضل ربنا اللي بيحن علينا الناس بيه.
< ريا يحيي عزبة جعوير – عايشة علي باب الله ولا قبض ولا صرف من أي حتة ولا عندي لا واد ولا بت وجوزي ميت من 20 سنة وأنا مش قادرة اشتغل وباعيش من اللي بيجيبوهاي الناس ولا عندي مية ولا حمام باملأ مية من عند الجيران.
< طاهر محمود بخيت عزبة جعاوير – جعاوير عزبة تابعة لابشادات والعزبة هنا بتفتقد لأدني الخدمات عندنا مدرسة واحدة شغالة الصبح ابتدائي وبعد الضهر إعدادي والعيش عندنا مخبز واحد مش بيكفينا احناعددنا الرسمي علي الورق 3800 إنما العدد الفعلي حوالي 6000 فمش موافقين انهم يبنوا لنا مخبز تاني لأن العدد لازم يزيد عن 5000 وعندنا مشكلة المية وطلبنا قبل كده التحليل السريع ولما حضروا حللوا المية وقالوا إنها سليمة لأن نسبة الشوائب 48% ولم تصل إلي 50%.
هذه هي حال قري المنيا فقر وأمية واحتياج وعوز وإلي متي سيظل الحال هكذا بعد أن ظلمهم النظام السابق فهل تنصفهم حكومة الثورة؟