يوميات زوج سعيد جداً
الجـزء الـسـادس عشـر
كنت لا أزال مستلقيا على السرير أحاول تذكر أيا من المواقف عندما إنفتح الباب وهلّت زوجتي الحنون التي ما أن رأتني مستلقيا على السرير حتى صرخت بصوت يشقق الجدران: إيه دااااااه؟ نايم بالقميص اللي لسه كاوياه، يا أخي حرام عليك، أنا مش ملاحقة عليك وعلى عيالك، دي لو خدّامة مكنتوش تعملوا كده
معلش أصلي نسيت -
قالت: نسيت!! طبعاً وتتعب نفسك وتفتكر ليه؟.. إنت كرمش والخدامه تكوي
قلت وأعصابى ترتعش: خلاص إيه اللي حصل يعني؟
قالت: خلااااااص!!! طبعا ما هو إنت اللي تقول خلاص وإنت اللي تقول لسه وأنا تحت أمرك تسكتني لما تعوز وتسيبني أهاتي لما تعوز
قلت: بقولك إيه اسكتي دلوقتي أحسنلك
قالت: ناااااععععممم. وهى ترقص وسطها إستهزاءً.. أحسن لي؟، لأ خوفتني.. ليه حتعملى إيه إن شاء الله؟
لم اسمع شيئا من باقي ذلك الموشح الرهيب الذى سمعته 86371 مرة منذ زواجنا، فقد أحسست براحة كبرى و أنا أتخذ قراري النهائي
*******
بالزواج من شهرزاد
........
*******
كنت أتابع دوما شكاوي النساء فى تلك الصفحات التى تموج بها الصحف والمجلات والتى تتحدث دوما عن خيانة الرجال وزواجهم بأخرى
ودوما تذكر الزوجة أنها قد ربّت الأولاد وأنهم تعلموا أفضل التعليم وأنها وقفت إلى جوار زوجها حتى أصبح ميسور الحال و أنها اتقت الله وحافظت على عرضه وأنها.. وأنها.. ثم تتباكى على الغدر والخيانة
عزيزاتي النساء أنتن مخطئات تماما.. هناك ما يسمى بالنقاط الصغيرة
ماهي النقاط الصغيرة؟
قديما كانت بعض الدول تنتهج وسيلة عجيبة لتعذيب المعارضين والاسرى، لم تكن تلك السياسة تعتمد على الجلد بالسياط أو الكي بالنار أو تقطيع الأعضاء
لقد كانت وسيلة رهيبة لا تترك أي أثر
كان أولئك الطغاة يجعلون السجين يستلقي على ظهره فوق لوح خشبي ويربطون يديه ويثبتون راسه بواسطة كلابتين فلا يمكنه تحريك رأسه إطلاقا
ثم يضعون المسكين تحت حنفية مياه تنزل منها نقطة واحدة كل 10 ثواني مثلا بحيث تسقط النقطة فى منطقة التقاء الأنف بالجبهة
إنها مجرد نقطة مياه لا يمكن أن تلفت الإنتباه.. ولكن الرتابة والتكرار المستمر يجعلانها سلاحا مروعا فيجنّ المسكين خلال يومين على الأكثر
ثم ينهار جهازه العصبي ويموت
هذا سيداتي ما تفعلنه بأزواجكن
إنها تلك المشاكل والتعليقات والمواقف التافهة جدا فى حد ذاتها ولكن تكرارها الرهيب يتكاثر عبر السنين حتى يفقد الرجل القدرة على الاحتمال فيجن ويتزوج
إرتاحت نفسي لهذا التفسير تماما فلا حاجة لي للبحث عن مواقف ضخمة وخطيرة من زوجتي فهي خير من اتبع سياسة النقط الصغيرة
*******
في اليوم التالي كنت في منزل شهرزاد والتي إستقبلتني بابتسامة شهية وفرحة واضحة بوجود خالها ووالدتها
تعارفت بخالها وكان رجلا ودودا وسرعان ما اتفقنا على كتب الكتاب بعد يومين فقط بحضور خالها ووالدتها وعدد محدود جدا من أقاربها فى أحد المساجد
طلبت أن نسافر بعدها مباشرة إلى إحدى القرى السياحية لنقضى عدة أيام فوافقت شهرزاد بوجه متهلل
*******
كان على أن أعد نفسي فأخبرت زوجت بأنني مسافر إلى الصحراء الغربية
قالت مندهشة: الصحراء الغربية؟
قلت: أيوه فيه شركة هناك عندها منجم منجنيز وعاملين كامب وعايزين نوصله نظام كمبيوتر
وحتقعد أد إيه؟ -
خمس ايام -
قالت: ليه دا إنت دايما بتكون مأمورياتك يومين بالكثير؟
قلت: أيوه بس ده منجم جديد وعايز شغل على رواقه، لازم أعمل تأسيس كويس للنظام
قالت: بس الصحرا دي بتكون صعبة والعيش فيها متعبة
قلت: دعواتك ربنا يقويني، هي المشكلة إن ما عندهمش تليفونات لسه والموبايل بيقولوا بيكون إرساله ضعيف وححاول أكلمكم كل ما أقدر
*******
إشتريتُ حقيبة جديدة ووضعتها في شنطة السيارة وأخذت اضيف إليها إحتياجاتي كعريس جديد
في العمل تحدثت إلى السيد أبو وائل زميلنا على إنفراد قائلا: بقولك إيه با أبو وائل أنا دايما بسمعك تشكر في خلطه كده بتأخذها علشان الفرفشة يعني
قال: آه خلطة أبو الشماريخ.. إيه إنت محتاج ولا إيه؟
قلت بسرعة: لا.. لا.. دا واحد صاحبي حيتجوز وبيسأل عن حاجه طبيعية تفرفش المسائل
قال: بص ياسيدى دي بيجيبها سالم
سالم!! سالم الساعي؟ -
قال: أيوه ما إنت عارف هو من بدو سيناء وعارفين الأعشاب الطبيعية
طيب خلاص ح اكلمه -
ناديت سالم أثناء إنصراف الموظفين وأخذت أشغله حتى إنصرف الجميع ثم قلت بصوت خافت: إسمع ياسالم أنا ليّا واحد صاحبي حيتجوز وكان عايز حاجة لزوم الفرفشة يعني وعرفت إن عندك خلطة حلوة
قال: أيوه ما كل اللي في الشركة بيأخذوها لأصحابهم برضه
تجاهلت رنة السخرية وتلميحه الوقح وقلت: أصله عزيز عليا ويهمني يكون تمام
ولا يهمك يا استاذنا إتفضل -
أخرج من جيبه كيسا به بعض الأعشاب المطحونة ذات اللون الأخضر وهو يقول: شوف يا سيدي معلقتين من دول ويخلي جماعته يدعكوهم فى زلموكة وزه وبعدين
قاطعته: نعم!!! زلموكة وزه!!! وكمان الجماعة اللي حيدعكوهم!!! مش ظريفة خالص اصل جماعته يعنى طالعين فيها وأكيد هو عايز ما يعرفهمش حاجة.. ماانت عارف بقى
قال: طيب خلاص يسف 3 ملاعق ومعاهم معلقتين زبده
زبده؟!!؟.. ممكن زبده
قلت: طيب الف شكر ياسالم ودول بكام؟
اربعين بس.. وطمّني على صاحبك -
أضفت الكيس إلى محتويات الحقيبة المخبّأة فى السيارة وأنا متأكد أنني لست بحاجة إليه.. ولكن من باب الاحتياط فقط
عدت إلى منزلي ودخلت إلى السرير مبكراً
غدا الليلة الكبيرة ولابد أن أكون في كامل لياقتي البدنية