====================
انا لما نمت حلمت بيكى
انا لما نمت حلمت بيكى شوفت ترسيمة شفايفك
لمحت عمرى بين ايديكى بيترسم فى جمال ملامحك
عيشتك بكل حالات وجودى
وف مماتى برضة عشتك
انا لون خدودك
انا اللى وقت ماتنحنى بيشد عودك
انا زكريات.. انا حب تايه فى الزحام
انا اللى مات... وجوة قلبه اشتياق بيقول كلام
بيقول بحبك
انا اللى حبك
انا اللى نفسه تكون نهايته جوة قلبك
انا اللى نام وشد شوقه اتغطى بيه
وشاف منامه بيترسملك
مانا اللى حبك
حتى حبيبتى اتجننت من عشقى ليكى
الغيرة مست قلبها
ازاى حياتى ملكها واعيشها بيكى
وازاى اكون مغرم صبابة بسحر نظرة من عينيكى
واحبها؟!!
ساكت كلامى
ساكت كلامى معدش فيه جوايا صوت
كان اتفاقنا انى اعشقك
مش انى اتمنى اموت
ماهو لو هاموت يفضل تراب عضمى اللى داب لامس ترابك
تفضل مشاعرى ولهفتى بتدق بابك
يفضل كيانى بيعشقك...ما انا اللى عايش يعشقك
انا اللى ليكى
انا المدارس والشوارع والزحام
انا القهاوى والاحبة والكلام
انا السلام اللى اتفرض ورضينا بيه
انا عشق محفور ع الحجر مكتوب عليه
انا المصرى
انا حالة
ما اناش مسكين ولا عالة
يجوز عايش بقلب حزين
وصاااابر
لو تعدوا الصبر يطلع صبرى بالملااااين
انااا قوة صلاح الدين
انا اللى رسمت دنيا جميلة فوق صدرى
مضيت فوقها بخط الدم من دمى
انا عاشق ودى امى
ودى اللى بتيجى كل ما انام على بيتنا وتضحكلى
الاقى عشقها اتشكل على شكلى
تقوينى بلمسة خفيفة فوق كتفى وانا باصص على عينيها
تنسينى اللى دوقته من فشل فيها
تخلينى انام واقوم اغنيها
واعيش بيها
ما انا منها وانا ليها
وانا السهران فى سجنى وحيد أناديها ... ومستنى
تجينى ف يوم تنادينى وتحضنى
تقولى اسفة ع الغربة وع الموتة الى ماتها الكل
على العيشة اللى مخلوطة بضعف وذل
على كل اللى باع فيكوا وانا واقفة وبتفرج
ولا قادرة اقول لأة ولا اسيب المزاد واخرج
تنادينى وتاخدينى ف حضنك اللى تاه عنى
واشتاق انى اموت فيكى
وأضم القـبر بدراعى ..... وأنا مصرى