الرفاقة
أفخر بخوة وفيين الصداقه
وافتخر بأهل المراجل والحميه
الرجال اللي لها باللطيب ساقه
هم هل الطولات وانصار الحذيه
حاشمين الجار بفعول ولباقه
مكرمين الضيف واهل الشاذليه
صاحبي بالطيب لاجاوز نطاقه
يرقب العسرات والدنيا مديه
عيشة الرجال من غير الرفاقه
عيشة المنفي بصحرا جرهديه
صاحب اللي مايغثك بالطفاقه
ممتلي بالعقل ويجمل خويه
ماتقلب كالهوى عند اصطفاقه
ثابتن مثل الجبل بالمهمهيه
واحذر من اللي يسمونه اعلاقه
مانفع نفسه ولا شَرّفْ مجيه
مايطل بخير وان سال اندفاقه
صب في صبخاه مايروي ضميه
السعيد اللي كسب لحظة فراقه
قبل ماتكمل دعاويه بقضيه
لايجيك بزيف وان زوّد نفاقه
لو بدا بالزين يثني بالرديه
لايغرك لين يرميك بحماقه
كنه اموصا على الشينه وصيه