|
طرق مختلفة لتورتة الايس كريم
الناقل :
SunSet
| العمر :36
| الكاتب الأصلى :
suzy79
| المصدر :
aarabladies.com
طرق مختلفة لتورتة الايس كريم
^
^
^
المقادير:
مقادير الكيكة:
كاسة ونصف دقيق ابيض
نص كاسة كاكاو بودرة
كاسة وربع سكر ناعم
4 ملاعق كبيرة حليب بودرة
1 ملعقة بكينج بودر
4 بيضات
ثلثين كاسة زيت
ثلثين كاسة مية
باقي المقادير:
ا علبة آيس كريم فانيليا ( مقاس 1 لتر)
2 بكيت بسكويت مكسرة
1 علبة كريمة بالشوكولاتة
قليل من اللبن السائل
================================
طريقة عمل الكيكة:
اولا نخلط كل المقادير الجافة مع بعض
ثانيا نخلط كل السوائل مع بعض بخلاط البيض الكهربائي
ثم نضيف المقادير الجافة الى خليط السوائل مع استمرار التحريك المستمر بخلاض البيض الكهربائي
ويحرك لمدة دقيقتين ويوضع في صينية مدهونة بالزيت وتخبز حتى تنضج
ملاحظة حطيها في صينيتين مقاس وسط عشان المقادير لصينيتين ولو حتعملي الكيكة لوحدها يعني عادي اعمليها في صينية واحدة
++++++++++++++++++++++++++++++
الطريقة:
بعد ماتخرج الكيكة من الفرن وهي لسة دافية اخلطي مقدار ملعقتين كبيرة من كريمة مع شوية لبن وحطيهم عالنار عشان يبقو زي الصوص الخفيف
اغرسي في الكيكة بالشوكة في اماكن مختلفة وصبي عليها الصوص وسيبيها تتشربه
بعدين ادهني الكيكة بكريمة عادية
اخلطي الايس كريم بالبسكوت ومتخليش الايس كريم يسيح منك يعني اخلطي بحركة بسيطة وسريعة
حطي طبقة الايس كريم على الكيكة المدهونة
وفي النهاية رشي من صوص الشوكولاته عليها بطريقة عشوائية
وسيبيها في الفريزر حتى تجمد
بالهنا والشفا
تورتة الايس كريم
جبتلكم الطريقة ديه من نايجلا لاوسون اللي بتيجي في فتافيت
المقادير:
هنحتاج كيكة او بواقي كيكة
مكسرات مجروشة خشن
لتر و نص ايس كريم جاهز اللي في علب
طبعا الكمية انتم اللي تحددوها
(النوع اللي تحبوه بأه)
الطريقة سهلة جدااااا:
لو عندنا بواقي كيك او تورتة او جاتو
نحط البواقي ديه في التلاجة علشان تنشف
و كده يسهل اننا نفتفتهم علشان يكونوا قاعدة لتورتة الايس كريم
و نخلط بالفتافيت ديه المكسرات المجروشة
(ممكن مانحطش مكسرات طبعا ده حسب الرغبة)
(بس بتدي رونق للحاجة و بترفع من قيمتها)
نجيب الصينية اللي هنشتغل فيها
و نفرد عليها ورق نايلون بحيث يكون مغطي جميع جوانبها
(بيتباع في السوبر ماركت لفة شبة لفة الفويل)
بحيث يكون ده شكل الصينية
و بعدين نفرد الكيكة اللي فتفتناها و خلطناها بالمكسرات
و نضغط عليها جامد علشان تنضغط
و كده نكون عملنا قاعدة للأيس كريم
طبعا احنا كنا سايبين الايس كريم في درجة حرارة الغرفة علشان ينفع افرشه بسهولة
ممكن نحط معاه شوية مكسرات مجروشة و نقلب كويس علشان المكسرات تتوزع كويس
(بس لو هنحط في القاعدة مكسرات يبقي بلاش نحط في الايس كريم)
(علشان الحاجة تطلع شكلها شيك)
و ننزل الايس كريم في الصينية علي قاعدة الكيك اللي عملناها
ممكن طبعا نعمل نوعين ايس كريم
(طبقتين)
بس الله يكرمكم الطبقتين يكونوا لايقين علي بعض
ممكن نحط الطبقتين علي بعض و خلاص
و ممكن نحط بين الطبقتين قاعدة تانية من الكيك المفتفت و فوقيها الطبقة التانية من الايس كريم
بس كده هنستني لما الطبقة الاولي تجمد شوي و بعدين تطلعها و نحط طبقة الكيك و فوقها الطبقة التانية للايس كريم
و نحطها في الفريزر لحين وقت التقديم
و تقدم من الفريزر مباشرة
و لما نقدمها طبعا سهل اننا نطلعها من الصينية بسهولة علشان النايلون اللي فرشناه في الصينية الاول
ممكن وقت التقديم نكون محضرين أي صوص
(اللي بنحبه و طبعا يكون لايق علي الأيس كريم اللي محطوط)
ممكن صوص شوكولاته
صوص كراميل بالمكسرات
لو الايس كريم شوكولاته ممكن الصوص يكون فانيليا
اهم حاجةاننا نراعي ان الحاجة اللي احنا حاطينها تناسب بعضها
(لايقة علي بعض يعني)
ممكن مانحطش صوص خالص و هتكون جميلة برضه
او ممكن نرش علي وش التورتة مكسرات
و ياريت طبعا لو هنعمل الايس كريم شيكولاته مثلا
ياريت الكيكة اللي هنسنخدمها قاعدة تكون كيكة شوكولاته
في ناس هتقوللي احنا ليه محطناش الكيكة او شريحة منها تحت الايس كريم عادي كده من غير ما نفتفتها
هقول ان الايس كريم لما بيسيح علي الكيكة بشكلها العادي بيخليها عاملة زي العيش المبلول
انما الفتافيت المضغوطة ديه هتقاوم شوي
طبعا انت ممكن تحطيها كده من غير ما تفتفيها لو متأكده انك اول ما تحطيها لضيوفك مش هيسيبوها تسيح
و هتتاكل فورا
و بالهنا و الشفا
|