السلام عليكم ورحمة الله وبركاته
هبدا بسؤال
هو لو حد ربنا اداله مثلا 100 الف جنيه وراح رماهم فى البحر مش الحد دا يبقى مجنون ؟؟!!
طيب احنا ربنا سبحانه وتعالى ادالنا عمرعشان نعيشه صح ونكون زى ما ربنا عايز ونحقق الحاجه اللى اوجدنا ربنا عشانها وبرضه بنضيعه
بس هو احنا اساسا اتخلقنا ليه ؟؟
يعنى ايه الحاجه اللى عملناها ولو مكناش موجودين مثلا كان العالم هيتاثر بعدم وجودها ؟
فين البصمه اللى سبناها فى الدنيا دى عشان بعد كدا لما نموت الناس يفتكرونا بيها؟
لما نقف بين ايدين ربنا يوم القيامه ويسالنا الوقت اللى كان عندكوا وانتوا فى الدنيا عملتوا فيه ايه يا ترى هنرد نقول ايه ؟
من وجهة نظرى
مجدى يعقوب اتخلق عشان مرضى كتييييير ربنا يجعله سبب شفاهم ورجوعهم للحياه من تانى
عمروخالد اتخلق عشان ربنا يجعله سبب هداية شباب كتير ورجوعهم عن طريق غلط كانوا ماشيين فيه
السادات اتخلق عشان يكون رمز للشجاعه والذكاء والوقوف مع الحق ورفض الاحتلال
احنا بقى بنعمل ايه فى الدنيا دى ؟؟
بيتهيالى لازم كل حد فينا يبقى عنده رساله فى الحياه
حاجه عايش عشانها و مستعد يموت عشانها برضه
ربنا مادالناش ابدا الوقت عشان نضيعه
بس احنا ليه الوقت عندنا ملوش قيمه؟؟!!
ربنا سبحانه وتعالى عظم اهمية الوقت فى ايات كتير .....كان بيقسم بيه زى:
قال تعالى :
" والليل إذا يغشى، والنهار إذا تجلى"
" والفجر وليال عشر"
" والضحى والليل إذا سجى"
"والعصر، إن الإنسان لفي خسر"
يقول الحسن البصري: "يا ابن آدم، إنما أنت أيام مجموعة، كلما ذهب يوم ذهب بعضك".
ويقول ابن مسعود: "ما ندمت على شيء ندمي على يوم غربت فيه شمسه، نقص فيه أجلي ولم يزد فيه عملي"
ويقول رسول الله "صلى الله عليه وسلم": " نعمتان من نعم الله مغبون فيهما كثير من الناس الصحة، والفراغ".
انا كنت بكتب الموضوع دا بمناسبة الاجازه
وبما ان (نفسك ان لم تشغلها بالحق شغلتك بالباطل)
ممكن هنا فى الموضوع نكتب ايه الحاجات المفيده اللى ممكن نعملها فى الاجازه