ملامح من بلادى
ملامح من بلادى ..... تشوفها لو كفيف
الظلم تشوفه عادى .... والحق تشوفه طيف
بيعيش فيها الجبان .... ويموت فيها الشريف
يتهان فيها العزيز .... ينداس فيها الضعيف
والجاهل فيها عالم .... والعالم ع الرصيف
ملامح من بلادى .... تشوفها لو كفيف
.....................................................................
وبلادى فيــــــــــــها ناس .... ميت شكل وألف لون
فيه ناس بتعيش على الأحلام .... وأحلامهم ساعات بتهون
وناس بتحن للماضى .... وناس عايشين على الحاضر
وناس بتموت ف كلمة لأ .... وناس متقولش غير حاضر
.....................................................................
وناس عايشين ف قلبيها ..وكارهين الحياه فيها
وحاسين انهم أغراب
وناس مش شاغله بالها بحد ..مفيش ف حياتها حاجه بجد
مبيحسوش بأى عذاب
وناس غرقانه ف مشاكل ..وناس مش لاقيه قوت تاكل
لا وناس عايشين يربوا كلاب
وناس أحزانها بتدوسها .. ومات جواها إحساسها
وشابوا وهم لسه شباب
..................
شباب بيضيع وشايف بكره بيقفل ببان الأمل
بنات زى القمر فى البيت ومستنيه ييجى العدل
وحلم الناس مهوش مسموح وتحقيقه مهوش محتمل
.............
ده حلم كبير فضل يصغر لحد ما جالوا يوم واختفا
ونور الشمس بيروح .. وطير الفرح بينوح .. وشمع الحب غاب وانطفا
وصوت الحق مش مسموع .. وقلب الفرح بات موجوع .. وشعب بحب صمته اكتفا
...................................................................
رحل الربيع مهوش راجع .... وساب ف بلادى جو مخيف
وورد الشوك مجرح فيه .... ونسمه تموت ف جو خريف
ملامح من بلادى .....تشوفها لو كفيف
الظلم تشوفه عادى ....والحق تشوفه طيف
...............................