تعرفون من أول اذا بغى الواحد يتزوج ما كان يشوف المره ويطالعها أو يتحدث معها أحياناَ يتزوج ( على الله وبالله) ويخطبون له بنت فلان ويأخذها وبس هذا واحد من الشعراء الحقيقة تزوج مبطي لكن ماش ما توفق في زواجه الأول وكلن راح بستره – وراحت المره بستر وقعد يدورعلى مره ولقي البنت اللي تعجبه وإلا فعلاَ يوم أخذ هاك المرة ولا هي حرمه هاديه وحبيبه ودمثة الأخلاق ولطيفه وتراعي خاطره وتداري مشاعره ومشاعر أمه وكان يقول يوم تزوجتها كنت في بيت واحد أنا وأخوي ووالدتي وأخوي الصغير الثاني وتو أخوي اللي أكبر مني متزوج ويقول حنا في بيت واحد عائله واحده , ويقول هالمرة هاذي حبيتها حتى الوالده حبتها لإنها ذربة وظفره وتشتغل معهم وتساعدهم بالمطبخ ما هيب تقول هذا ما هوب علي وذا علي اليوم ( بلاها والله مهيب من بنات الحين كان تحلف مية يمين ما تطبه ) وتداري خاطر زوجها إذا جاء وتقهويه وتسولف معه وتشوف إن كان الرجال هاك اليوم وجهه سفر وحليل ولا عنده خلاف ما زحته وداعبته وضحكت معه وش تشتهي يا ابو فلان وش نجيب لك يا فلان وتريحه وتبعده عن الصجه واللجه وتخليه ينام الظهر مرتاح وإلا بغى يطلع تلاحظ ملابسه المهم إن هالمره من يوم أخذها وهو مرتاح معها إلين الله وسع عليه واشتغل وأخذ بيت له جنب بيت اهلها وقام يأثث البيت , المهم يقول انا مرتاح معها وتداري خاطري ولاتؤذيني بكثر الطلبات اللي أنا اجيبه فيه بركه كل ما جبت شي قالت الله يوسع عليك ويجزاك خير وعساك على غناة وكل شي تمام يقول أرد الله أن حنا عقب ما مضي تقريباَ حول سنه – المره حامل وعلى وشك إنها تضع يقول : تجمعوا ربع لي وأصدقاء وراح هو واياهم في رحله مقناص بعيدة ويقول معنا بعد واحد حنا في ضيافته واحد من الشخصيات راحوا معه كل هاللي رايحين إلى القنص مع واحد كبير مثل ما تقول من الأمراء , المهم رايحين بعيد معه ويقول رحنا وطولنا في رحلتنا هذه قعدنا فوق الشهر يقول رحنا في مكان كل اللي حولنا باديه وكل يوم لنا مكان يوم بين ظلعان ويوم في سهل ويوم رمال ويوم نتنقل , والسيارات توها في بدايتها ما كان عند الناس سيارات واجد يقول في رحلتنا هذه يوم جاء يوم من الأيام وإذا فيه واحد من خويانا في هالرحله يبي يروح للديرة قاموا وسألوه الربع اللي قاعدين يا فلان تبى تروح قال إيه لإنه موصيه الأمير يروح يجيب لهم أغراض قال زين تكفى الله لا يهينك تطق على أهلي وتعطيهم شوي هالفقع هذا قال الثاني من فضلك بعد تمر على والدتي وشف هالإقط هذا عطهم إياه . قال زين ويوصيه واحد يعطيهم شوي سمن وذاك طق على أهلي شف إن كان هم يبون شي أو يحتاجون شي عطهم فلوس وأنا لاجيت أعطيك يقول هو من ضمن اللي هم وصوا بعد – الشاعر هذا الشاعر اسمه ( جديع بن سودان العنزي ) يقول جديع قمت أنا وصيته قلت من فضلك تكفي مر على أهلي وشف أن كان يبون شي وإن ما لقيت أهلي في بيتي أنا اللي وصفته لك تلقى بيت عنه شوي في أسفل السوق هذا بيت أهلي تقلى أخواني قل لهم يسلم عليكم وأنه بخير وصحة وطيب ولاعندي خلاف ويسأل ويقول وشلون الأهل وعطني أخبارهم وعلومهم , قال : زين .
جاء المرسال ذا وبعض المرات المرسال يصير ما هوب حكيم يصير الله يهدينا وياه عجل أو غير مبالي المهم طقق عليهم كلهم واعطاهم الشي على عجله لأنه حريص على شغل الأمير اللي مروحينه له المهم طق على بيت جديع وإلا ما عنده إلا الغبار مغبر عند باب السوق عرف أنه مابه أحد راح لإهله وطق عليهم كيف الحال ؟ طيبين ؟جديع طيب ويسلم عليكم ها وش لون العلوم ؟ قال : أبد ترجع لمه ؟ قال : أيه , وتقول أمه علمه أن مرته أظنت وجابت وليد وأن الوليد هذاه عندنا بلشين به ندور من يرضعه قال : أمه وراء ما ترضعه ؟ قالت : قدر الله عليها وتوفت أثنا الوضع أنا الله قال : الله يجبر عزاكم , لمهم عرف الهرجه وأنه زوجته توفت وإن الوليد ذا بلشين به يبون يدورون له من يرضعه . رجع عليهم عاد هذا متى وصلهم يالله عقب ثلاثة أيام لان محلهم بعيد ما فيه خطوط مزفلته من أول تغاريز ورمال ومادري ويش المهم جاهم في الليل وهو يوم جاهم والاه منعفس ومغرز يجي له ثلاث أو اربع مرات ولا عاونه أحد ومتبهذل ومنغث وجو لمه في الليل يسألونه كل يمسكه مع جهه ها ويش صار على ذا ويش صار قال يالربع أبي اعلمكم أنت اهلك يسلمون عليك وأنت أهلك يقولون لك كذا وانت أمك مصخنه وذاك أخوك الصغير إنحاش عنهم له يومين يدورونه وإلا الأخبار كل اغلبها مهيب زينه قال جديع وأنا قال انت بعد زوجتك ما تت الله يغفر لها وير حمها وإلا يوم طقه بها العلم يومه يروح ما فيها الا العافيه , المهم يالربع يقول جديع ما نمت ذيك اليله الله لا يعيده لا هو ولا علمه ! ليته بس مخليه للنهار يقول هالك الليلة أن طالعت هالدله ذي تصورت قدامي المره وإن طالعت الفنجال هذا تصورتها قدامي وأن رحت يمين يسار وإلا كل ساعه أشوفها يالله غربله يالله يوم يقولي هالعلم في الليل – الحاصل يقول من جاء الصبح علموا طبعاَ الأمير وتأثروا كل الربع كل قال لي أحسن الله عزاك لكم إلى الان وأنا منعفس بين المصدق والمكذب ويقول جينا نفطر ما اسفهليت ألا حولنا جبال وظلعان يمين ويسار وكل ساعة اعدي لي في ظلع واروح في ظلع ويقول حس الأمير اللي أنا معه أني ما أجلس ولا يمسكني مكان قال جديع , قال نعم قال شف السيارة الثانية تبي تروح للماء أركب مع راعي الوايت الين تقدمك شوي ورح لهلك تأكد منهم وسلم عليهم وتطمن قال الله يجزاك خير ياطويل العمر, المهم وصل أهله عقب يومين وصلهم مسيان ويقول يوم وصلت هناك وجيت للبيت وقبلت على بيتي وافتحه وإلاه مغبر ويقول واروح لم غرفتي أنا وياها وإلا يوم كهت على ريحه الغرفه فيها ريحان وطيب وذا يقول أتذكر ريحتها يقول يوم طالعت وإلا هذي ثويباتها معلقه وغريضاتها منا والمواعين بعضها ما غسل ويقول وأنا انعفس ما عرفت اقعد بها البيت ابد أجي لأهلي وألا أمي تقول ابشر بالعوض إن شاء الله ما يكون إلا الخير والوليد ابشرك بخير يحاولون هم يطمنوني وأنا ماش يقول قعدت عندهم يومين الين تدهدهت الأمور ورجعت لمعزبي اللي أنا معه ويوم وصلتهم هاه , وشلونك ؟ قال : أن شاء الله طيبين يقول إلى هالحين إذا جو يفطرون والا يتغدون ما ارتاح بالي يقول ما ادم أني بالنهار وأنا مسفهل لكن لا جاء الليل الله يجيرك قال الحزن اشتد بيديك ( بليس الله يعيذنا منه يوسوس لك ) يقول رقيت إما على ظلع منا والا منا وقعدت فيه إلين الصبح ويوم جاء يوم حول الفجر وأنا اعدي في هذاك الرجم جبل جنبنا وأبطيت فيه يقول أثر الأمير فقدني وجاء لي هنا وأنا في رأس الجبل يقول يوم جيت للرجم هذا وإلا عنده قبر وهذا اللي حزني زيادة تذكر قبرها يوم شافه ذا القبر لانه يوم سأل عنها يوم يجيهم قالوا تراها توفت وتطلبك الحل وإن حنا قبرناها , في هالمقبره هذي شف قبرها إلا دخلت شفه ثاني قبر على يمناك يقول وفعلاَ رحت شفت القبر وشفت ترابه جديد ونصايبه جديده وعرفت أنه هذا هو يقول اقلب القبر وإلاه حصي مرصوص ما يفيدني القبر بشي رجعت يوم رجع عاد وعدا في هالجبل اللي هو فيه جاء عقب ما جاء معزبه وجاء عند الرجم وشاف القبر هذا ذكره وقال الابيات هذه :
|
|
|
يا رجـم عديتـك وعدابـي البيـن
والقلب فـي رأسـك تبيـح كنينـه
|
|
الله لا يسقـي مفالـيـك عامـيـن
ذكرتنـي راع الطبـوع الحسيـنـه
|
|
مرحوم ياللي جهزوا يـوم الاثنيـن
العصر من فـوق النعـش شايلينـه
|
|
رصوا على منبوز الارداف سافيـن
رصـوا عليـه اللبـن وموحدينـه
|
|
ياليت كفي حدر خده عـن الطيـن
والكف الآخر فوق صافـي جبينـه
|
|
وياليت يومي قبـل يومـه بيوميـن
ليت المرض مـن بيننـا قاسمينـه
|
|
لا ياحياة الشر عقب اريـش العيـن
لاواهنـي مـن شافـنـا مقتفيـنـه
|
|
شربت أنا من صافي الغبن كاسيـن
هـذا معاليقـي وكـبـدي متيـنـه
|
|
ياونتـي ياشيـن فرقـا المحبـيـن
وياعين ياللي مـن فراقـه حزينـه
|
|
يا سهر عيني والمخاليـق ممسيـن
وياقلبـي اللـي مثـل دق المكينـه
|
|
قالوا حزين وعشرك اليـوم ثنتيـن
قلت اعذروني زين الاطبـاع ويـن
|
|
قالـوا تخيـر بالبنـي المزايـيـن
قلـت العـذارى غيرهـا منكرينـه
|
|
قالوا عجوز وقلت أنا وفالكم شيـن
الخمـس والعشريـن قيمـه سنينـه
|
|
وجدي عليها وجد راعـي بعاريـن
ممس ( ن ) خلاوي والسرق حايفينه
|
|
هن رأس ماله وشلعوهـن شياطيـن
واصبح على الجـره يفـرك يدينـه
|
|
أو وجدي من لحقوه طلابـة الديـن
صكـت عمـي القايلـه مطلبيـنـه
|
|
لحقوه عكفـان الشـوارب مغليـن
وتشـا وحـوه بكـل شلفـاَ سنينـه
|
|
هذا وصلـوا عـد نبـت البساتيـن
عـلـى نـبـي كلـنـا تابعيـنـه
|
|
|
يوم قال القصيدة هذه ونزل ولاحظ الأمير قال هاه أنت راقي ذا الرجم كنك تونون وتومي بالسبحه وش عندك أكيد أنك قايل شي قال والله يا طويل العمر مثل ما تخبر الرجال اللي فاقد زوجته وهذا لابد أنه يقول واسمعه القصيدة قال ابشر بالعوض ويقول جزاه الله خير ما قصر وساعدني , وعقب ما دخلنا و اوفينا مده تزوجت لكن ماش إلى هالحين مالقيت عقبها حريم سنعات عقب هاك الاوله .
يقول عاد تزوجت لي وحدة واثر الوحده هذه لها عمه وتخيط ثياب وشارطين علي قالوا : ترى تروح لعمتها تخيط ثياب عندها وتقعد عند عمتها وتشتغل معها يقول قلت ما يخالف أن كانه الضحى وقت فراغ وذا بعد تروح توسع صدرها عند عمتها إلين اصير موجود المهم لا أجي للبيت إلا هي فيه وغداي زاهب وعشاي زاهب وكل شي قالوا ابد مالك إلا الخير يقول مره مرتين ثلاث كل ما جيت وإلا ما هي في البيت يامره وين أنتي ؟ قالت عند عمتي إنا الله يقول يوم جاء هاك اليوم ويجي قبلها الظهر ويقعد إلى العصر ما جت وهو يبي غداه يقول وإلا يوم جت طابخه وآيا عمتها غدا وجايبه معها شوي ويقول يوم طقت الباب قال هاه قالت جايه من عند عمتي قال على يسراك على يسراك ما عاد والله تدخلين البيت ( بلاك والله ما حبيتها مسيكينه 
) كيف ؟ قال: ابد خلاص عودي يقول عاد ..
|
|
|
حذرى عن اللي لها عمـة
لو تنثـر العطـر بالجيبـي
|
|
دايم عسى مـا لهـا رمـة
تهرف كما ياهرف الذيبـي
|
|
ألا قلت علم ( ن) ماهي لمه
تقول أبا انحـر معازيبـي
|
|
بارودي اللـي بهـا زمـه
حلالـه القـوم وتصيبـي
|
|
|
وسلامتكم وتعيشون ..