تبيني أبتدي واطرح سؤالي ... أبيك تفسِّر الحلم الخيالي
وتشرح لي تفاصيله الجميله ... وتوعدني على شوفتك تالي
أنا بصبر ولو صبري تعدَّى ... وبتحمَّل ولو مهما جرالي
بضحِّي .. وانت تستاهل اضحِّي ... على شانك لانِّك راس مالي
أشوفك شي نادر في عيوني ... وحيد وغير عن كل الرجالي
تذوب العاطفه بهمةْ حديثك ... ويقوى بصوتك الدافي احتمالي
انا منِّك حبيبي وانتْ منِّي ... تجمِّعنا الأصاله والمعالي
قبايل والشرف فينا تشرّف ... نعم واحلامنا فوق المحالي
أنا أعرفك وتعرفني وتعرف ... تراني بنت ابوها ولا تبالي
لي عزومٍ على الشده قويِّه ... ولي نقطةْ ضعف وحده .. جمالي
وراعي الوصف قد هو قال كلمه ... تخلَّد ذكرها أول وتالي
ورا أعظم رجل حرمه عظيمه ... وفيَّه شامخه مثل الجبالي
وهذي هي أنا .. هذي .. أنا اشْهَد ... عساها رويةْ الحلم الخيالي