ماأعرفش حاجة اسمها حواجز للطموح
أنا شاب عندي 18 سنة في سنة أولى طب جامعة عين شمس.. دخلتها بعد 4 سنين خدمة شاقة في ثانوي.. مشكلة الامتحانات، منها لله بقى.
مشاكلي بقى هي:
- حاسس بتفاوت مع صحابي اللي معايا، برغم إن مفيش فرق سن أصلا، عايش مع نفسي، اهتماماتي حاجة كده لوحدها، قليل أوي لما ألاقي منطقة معينة بتجمعني مع حد، بافرح بس برضه بيفضل عائق النرجسية جوايا.. طيب أنا عندي داء جنون العظمة؟ لأ، طب يا ريتني أعرف أكون مغرور ولو ليوم واحد..
- ماأعرفش حاجة اسمها حواجز للطموح.. وعشان كده بيجي لي اكتئاب كبير لما أفشل في حاجة، حتى لو كانت صغيرة، وده برضه بيخليني أتحدى نفسي، زي مثلا أسيب المذاكرة للآخر وأقعد كذا يوم وأجيب درجة كويسة.
يمكن باضحك على نفسي، بس أنا مقتنع إني عبقري!! وإني اتخلقت عشان أغيّر الكون ده، ظهرت النتيجة، وجبت مقبول رغم إني ماذاكرتش ولا حرف.. عايش في اكتئاب دلوقتي, عارف إني غلطان أكيد، بس أنا حاسس دلوقتي إن السنة اللي قعدتها زيادة في ثانوي وعلشان مادة واحدة هتروح هدر.
أنا أصلا كنت حاطط عيني على ترتيب على الدفعة، بس وكأن مشاكل حياتي كلها حصلت في الترم الأول ده.. أخرج من حاجة وأقول خلاص هاحترم نفسي وأقعد أذاكر.. تحصل حاجة أكبر لحد ما زهقت..
أنا كنت مقتنع إني اتظلمت في ثانوي وفي السنة اللي قعدتها دي كان معايا فيزياء بس، مافتحتهاش غير قبل الامتحان بـ3 أو 4 أيام، لأني كنت مقتنع إن مكاني في كلية الطب، وإن ربنا مش هايضيع السنة دي كده.. بس في نفس الوقت حسيت إن ممكن ماشتغلش وماذاكرش وبرضه الأمور تمشي وكله يبقى تمام.
مشكلتي الأساسية السنة اللي قعدتها دي.. وإني مش قادر أنسى الماضي علشان أتقدم، يمكن تكون رسالتي متلخبطة ومش مفهومة، بس أقل حاجة إني استريحت من الحِمل ده، ميرسي ليكم مقدما.
free2polite
صديقي الجميل مشكلتك من أجمل المشاكل اللي استمتعت بقرايتها، لأنك كنت بتكلم نفسك أكتر ما تكون بتفضفض لحد، وده خلاني أتخيلك، أنت ذكي فعلا وتكاد تكون عبقري، اللي بينجح من غير ما يذاكر وكمان بيدخل "طب" ده شخص عبقري بالتأكيد.
طب وفين المشكلة؟ المشكلة يا صديقي في أنك "مش هنا"، عارف ليه بيقولوا على الشخص المغرور "مناخيره في السما" وليه حتى في الإنجليزية لما واحد يحب يقول على نفسه متواضع فيقول I'm down to the earth وإيه علاقة ده بما قلته عن النرجسية وجنون العظمة وإحساسك بالتفاوت أو إنك ماتحطش سقف لطموحك أو إنك عبقري أو إنك اتخلقت عشان تغير الكون.
ده له علاقة قوية ومهمة جدا، اللي مناخيره في السما شخص مش هنا، رجليه مش على الأرض، إنت ممكن تكون ذكي وعبقري وفيك صفات هايلة كتير، لكن قول لي مثلا تقدر تطير؟ طيب ممكن تشتغل وتصرف على نفسك؟ طب ممكن تصلح الثلاجة بتاعة البيت لو باظت؟ أو تنزل تصلح بلاعة العمارة لو انسدت؟
صديقي في كام مبدأ كده تعالى نتفق عليهم في الأول، أولا إن ربنا عادل، ومافرقش بين إنسان والتاني، لكنه خلقنا في درجات، عشان نحتاج لبعض، بس كل واحد واخد حقه 24 قيراط ولو في ظلم فمن أنفسنا، يعني إنت طبيب بس هاتحتاج لي كصحفية وأنا وإنت هانحتاج للزبال والسباك والكهربائي، وكل إنسان في الحياة له قيمة.
"وقيمة المرء ما يحسنه" كما يقول الإمام علي عليه السلام ، يعني قيمتك هي علمك أو مهنتك أو عملك وذكاءك واجتهادك هو اللي بيساعدك تحسّن كل ده، فتخلي قيمتك أكبر، فيبقى مش كل طلاب طب زي بعض، ويبقى مش كل دكاترة المخ والأعصاب بنفس الخبرة، رغم إنه كلهم درسوا نفس المناهج.
إنت فعلا إنسان مميز، بس كل إنسان بيحس إنه مميز، وفي مثل صعيدي بيقول "كل نفس متسلطنة في جتتها" بمعنى أن كل إنسان بيحس جوّه منه إنه سلطان، بس إنت مميز فعلا، وعن جدارة؛ لأنك ذكي وبتدرس في كلية مرموقة جدا، ومهنتك المستقبلية لها رسالة عظيمة ومهمة لكل البشر على الرغم من وضعها في مصر.
بس في النهاية إنت هتكون طبيب ومش هاتقدر تفهم يعني إيه إنسان يساعد إنسان على إنه يخفف آلامه أو يتخلص منها غير لو مرضت وربنا طبعا يعافيك، وكمان اللي بيخليك مميز هو طموحك اللي مالوش سقف ورغبتك في تغيير الكون للأفضل.
كل ده بيخليك إنسان مميز، لكن عمره ما هيخليك الأكثر تميزا من كل الناس التانية، أو الأفضل في الدفعة، أو أحسن دكتور في مصر، ولو عاوز تعرف إزاي تبقى فعلا كده، لازم في البداية ترمي الماضي ورا ضهرك أول بأول، لأن اللي بيبص على الماضي عمره ما بيعرف يعيش يومه أو يخطط لمستقبله.
وتاني حاجة تخلق لنفسك هدف وتحطه قصاد عينيك، وتملا بيه أوضتك وهوامش كتبك وحياتك، قرر إنك تبقى الأول على الدفعة، أو تجيب تقدير معين، أو تجتهد عشان تاخد منحة وتسافر في الأجازة تتدرب بره، خطط لبكرة وارسمه في خيالك، احلم بيه، ومجرد الحلم هيكون خطوة عشان يتحقق.
ثالث حاجة، بص على اللي في إيدك وخلي رجليك على الأرض، إنت مش ملاك ومش شيطان، جايز تكون ذكي أو عبقري بس ده مش معناه إنك بتعرف كل حاجة، افهم إن معارفك محدودة، عشان تقدر تطورها ذاكر واجتهد، وأتقن ما تحسنه عشان تحقق الترتيب على الدفعة لأن الذكاء مش كفاية، لازم تشتغل على نفسك.
وفي ناس ناجحة كتير لما سألوهم عن أسباب نجاحهم ماحدش قال إنه ذكاءهم الخارق أو عبقريتهم، لكن قالوا إنه الإرادة أو المثابرة أو الصحيان بدري، تخيل! واعرف إنك حتى لو مميز عن الكثير من الناس، بس مسيرك تحتاج لهم، لأن بأبسط مثال إنت لو تعبت مش هاتقدر تعالج نفسك ولا إيه يا دكتور؟!