أنا عندي مشكلة وحياتي كلها واقفة بسببها، أنا مخطوبة من سنة وبحب خطيبي أوي وهو كمان بيحبني وماقدرش أعيش من غيره أبدا، ومن يوم لما اتخطبنا وهو وبس اللي في حياتي، وبعدت عن أصحابي كلهم البنات والشباب علشان أرضيه، وعلشان هو هيبقى جوزي ولازم أحترمه وأسمع كلامه.
إحنا دلوقتي بعيد عن بعض من 5 أيام، مش بيسأل عني ومش بيكلمني، هو لما بيبقى مهموم من الشغل أو ظروفه المالية بيبعد عني، وأنا مش ليّ ذنب، وكمان قال لي إني مش قادرة أحس بيه، وإني مش قادرة أقدر ظروفه، وطبعا ده مش صح، وهو مش بيقول كده غير لما بيكون في مشكلة وعايز يتهرب مني ومش عايز يتكلم معايا.
في كل مرة بيبعد وأنا مش باكون غلطانة، وأنا اللي باروح أكلمه وباقول له إني مش قادرة على بعده مهما كان السبب، وباتعب وبيجي لي حالة نفسية، بس المرة دي مش قادرة أتنازل زي كل مرة، وبرضه مش بقيت قادرة على حرماني منه، كده هو بعد عني خالص وأنا محتاجة له أوي.
بس أنا بقيت حاسة إنه خلاص مش محتاج لي، أنا حاسة إن ده آخر اللي بينا، مع إن اللي بينا مش ينفع يكون له آخر، أنا فعلا تعبانة أوي لأنه مش مجرد واحد بحبه لأ ده خطيبي وحبيبي وصاحبي وكل حاجة في حياتي، محتاجة لردكم أوي لأني حيرانة أرجو النشر والرد في أقرب فرصة أرجوكم.