بتـــــاريخ : 7/14/2012 2:56:35 PM
الفــــــــئة
  • الأســـــــــــرة
  • التعليقات المشاهدات التقييمات
    0 1391 0


    نصايح ذكية لأكلات رمضانية هنية (1)

    الناقل : elmasry | العمر :42 | الكاتب الأصلى : بص و طل | المصدر : boswtol.com

    كلمات مفتاحية  :

     

    أفضل الطرق لحفظ مجموعة كبيرة من الخضراوات
    أفضل الطرق لحفظ مجموعة كبيرة من الخضراوات
    النهارده "سفرة دايمة" بتقدّم لكل ست بيت نصائح مطبخية سريعة؛ علشان تقدري تستعدي لرمضان وإنتي واثقة في نفسك، وتقدري ترجعي من شغلك تحضري أشهى الأكلات لعيلتك..

    أفضل الطرق لحفظ الخضراوات
    طبعا مافيش أحسن من إنك ترجعي من الشغل تلاقي الفطار جاهز، وده ممكن تعمليه بسهولة؛ لو حضرتي أكياس من أنواع الخضراوات المختلفة تكون سهلة وسريعة في الطهي، ودلوقتي هنشوف أفضل الطرق لحفظ مجموعة كبيرة من الخضراوات..
     
    البامية والفاصوليا والبسلة
    نظّفي الخضار، واغسليه وسيبيه ينشف، وبعد كده شوّحيه على النار مع كمية مناسبة من البصل وكمية صغيرة جدا من الزبدة، لمدة 3 أو 5 دقايق، وبعد كده سيبيه يبرد وقسّميه في أكياس بلاستيك، بحيث إن كل كيس يكون فيه الكمية اللي تكفي لوجبة فطار على حسب عدد أفراد العيلة عندك.
     
    الملوخية
    هاتي الملوخية وقطفيها واغسليها كويس، وحطيها في مصفاة علشان تصفي ميتها كويس، وبعد كده خرّطيها وحطّيها في أكياس نايلون ناشفة وحطيها في الفريزر.
     
    ورق العنب
    هاتي ورق العنب واغسليه كويس، وبعد كده حطّيه في ميه مغلية لمدة 3 دقائق، وشيليه منها وحطّيه في مصفاة يصفي ميته ويبرد، بعد كده لفّيه في فوطة ناشفة وحطّيه في أكياس نايلون، بس اتأكدي إن الكيس مافيهوش أي أثر للهواء، وبعد كده حطيه في الفريرز.
     
    الكوسة والباذنجان الأسود
    اغسليهم كويس وقشّريهم وقطّعيهم بالطريقة اللي تعجبك سواء حلقات أو بالطول، وبعد كده حطّيهم في الميه واغليهم على النار، وبعد كده سيبيهم يبردوا، وينزّلوا الميه بتاعتهم، وبعد كده احفظيهم في أكياس في الفريزر، وممكن كمان تقليهم وتصفّيهم وتحفظيهم.
     
    الطماطم
    أحسن طريقة لحفظ الطماطم، إنك تشتري كمية منها بس تكون حالتها كويسة وجامدة شوية، وبعد كده تغسليها وتحطّيها لمدة دقيقتين في ميه مغلية، وبعد كده تشيليها وتحطّيها على طول في ميه مثلجة، وبعد كده تقشّريها، وتقطّعيها نصفين بالعرض وتشيلي البذر والعصير اللي جواها، وبعد كده حطّي قطع الطماطم في برطمانات زجاجية معقمة ومعاها شوية ملح صغيرين ورشة من عصير الليمون، وراعي إنك تكبسي الطماطم كويس أوي جوه البرطمان علشان تتخلصي من أي هواء فيه، وفي الآخر حطّي كمية من عصير الطماطم اللي اتبقى عندك بعد ما شيلتي منها البذر، واقفلي البرطمان كويس أوي، ونظّفيه كويس، وشيليه في الفريزر.
    ولغاية هنا خلصت نصايحنا..
    استنونا الأسبوع الجاي علشان نكمّل استعدادتنا لرمضان..
    سلااااااااااام،،،

     

    كلمات مفتاحية  :

    تعليقات الزوار ()