مساج الجسم أو تدليك البشرة من الحاجات المهمة جداً اللي المفروض كل بنت تحرص إنها تعملها على الأقل مرة كل أسبوع؛ لأهميتها الشديدة في تنشيط الدورة الدموية للجسم وتقوية عضلات الجسم والوجه وإزالة آثار الإرهاق والتعب
اللي ممكن إنها تظهر على البشرة، مش كده وبس ده كمان بينظف البشرة وبيساعدها على التنفس.. علشان كده حبيت أقول لك النهارده إزاي تعملي مساج لنفسك.. وهنبدأ بـ....
مساج الوجه
بصفة عامة هتلاقي إن التدليك بيكون بأطراف الأصابع مع الضغط الخفيف، مع التركيز على الأماكن اللي فيها التجاعيد، وخدي بالك لما تيجي تعملي مساج للوجه تقسّميه إلى خمسة أجزاء؛ منطقة الجبهة ومنطقة الأنف ومنطقة الخدود ومنطقة الذقن ومنطقة العنق؛ وده لأن كل منطقة فيهم ليها طريقة معينة في التدليك فهتلاقي..
1- منطقة الخدود
ودي أول حاجة المفروض إنك تبدئي بيها لما تيجي تعملي مساج الوجه، وكل اللي هتعمليه إنك هتضعي على إيديكِ شوية كريم مرطب، وتدعكِ بيه منطقة الخدود بس خدي بالك إن الدعك ده يكون بلطف في حركات دائرية وما ياخدش أكتر من دقيقة واحدة.
2- منطقة الجبهة
وفيه بتبدئي من الحاجب وبتسحبي الجلد لأعلى حتى منابت الشعر، وبعد كده بتنزلي من جانب الوجه لغاية الخدود، وتكرري الطريقة دي خمس مرات وكل مرة مش بتزيد عن دقيقة.
3- منطقة الذقن
بتبدئي من أسفل الذقن وتطلعي لغاية الفك السفلي بحركات دائرية، وتطلعي كمان في اتجاه الأذنين، وتكرري الطريقة دي خمس مرات وفي النهاية بتفركي قمة الخدود بأطراف الأصابع عدة مرات.
4- منطقة الأنف
بتبدئي بتدليك الجلد عند فتحتي الأنف، وبعد كده بتتجهي لأعلى نحو الخدين.
5- منطقة العنق
بترفعي ذقنك لفوق شوية، وتدلكِ رقبتك من تحت لفوق بإيديكِ الاثنين، وبعد كده تنزلي من خلف الأذنين حتى جوانب الرقبة.
مساج الجسم
بعد ما تخلصي مساج الوجه، ممكن تستعيني بصديقتك أو أختك علشان تعملي مساج لجسمك، والجسم عامة بيكون تدليكه بطريقة دائرية، أما بالنسبة للأيدي والأرجل بيكون التدليك من تحت لفوق... وخدي بالك إنك لو كنتِ حامل يبقى لازم تعملي مساج للبطن والأرداف يومياً بالشاور جل أو بالاسكراب بس بطريقة خفيفة جداً، وده هيساعدك على التخلص من الخطوط الحمراء اللي بتظهر أثناء الحمل.