عزيزى جوزى المنتظر
اللى يمكن جاى ويمكن برضه جاى ... فى وقت تانى
وفى مكان كل حاجة حلوة واقع فيه وما هياش أمانى
لو سمحت .. اوعى تفتكر ان انا مهما انجرحت انجرحت
الجروح انا واقفة فوقها وهى تحت
ولو معاك مفتاح لقلبى وجيت فتحت
حتلاقينى ... كلى مقرية فى عينى
شكلى واضح .. طبعى واضح .. صوتى من زعيقى رايح
ضحكتى وحزنى فضايح
قلبى فى كل اللى حوالين منه طايح
*****
مش قديمة .. لكن قديمة
مؤمنة ان الكلمة حاجة ليها قيمة
يعنى بالتالى تلاقينى ليل نهار بدى نصايح
عاملة زى الشربة .. صعبة بس بتسهل كتير
احلى حاجة فيا هى .. نفسها عيبى الكبير
*****
لو عاوزنى خدنى انا ونفسى على بعض
شروة واحدة انا اصلى نازل عليا عرض
يعنى كله بسعر واحد .. انا وجاى معايا .. جنونة .. وضمير
اشترينى لو بتفهم فى التحف والانتيكات
حاجة سينييه من زمن ايام ماكانوا البنات لسة بنات
حاجة مش مستعملة
حتة مش متبهدلة
حختصرلك وصفى وافهم .. ست بيت على عيلة
*****
الطبيخ بيحب يبقى من ايديا
والضفاير برضه بعملها بأيديا
ييجى وقت عليا أأنتخ
ووقت تانى تشوفنى وكأنى كتيبة رايحة جاية
اوعى تفتكر انى ملبوسة كفى الله الشر .. لأ انا عادية
لما حتكلمنى فى أحوال البلد دى حتلقى صوتى قد صوتك
وان ناديتلى بكلمة حلوة فجأة هتحول لشــــادية
اللى قدامك دى واحدة بجد مجنونة ودوشة
وبرضه بنت حلال وهادية
لما حتقول الحقيقة .. حعشقك ب200 طريقة
واما هتحور وتكدب .. يبقى تشــــــــرب
حتلاقينى فى لحظة فى الجبهة المعادية
*****
فيا مليون الف ست حتلاقيهم
لما تختارنى وتاخدنى شروة بيهم
حتلاقيهم ويا بنت جوه منى
وحتلاقيها البنت دى بتدارى فيهم
بنت طلباتها بسيطة
جايز اما انت تعاملها تشك اصلا انها مش ع الخريطة
او ماهيش واعية وعبيطة
*****
عمرها ماحلمت تقابلك طـــول بعـــرض قصادها طــور
ولا قلبها البرىء عاملك معاملة اللى داخل على مكتب التنسيق
واشترط تبقى مهندس او دكتور
عمرها ما إتمنت انك تبقى طالع م الفانوس
عندك الفيلا اللى هى .. او راكب احدث عربية
هى اصلها فى نظر الجعــــان تتشاف غبية
مش بتبهرها الفلوس
هى كل اللى بتشغلها .. النفـــــــوس
عايزة واحد لسة نفسيته سليمة مش واكلها السوس
مش منفسن م اللى حواليه مش جاسوس
*****
حد اجدع منها ارجل منى
حد يفهمنى أما اغنى
حد يبقى لازمه عقلى .. قلبى .. كلـــــى
حد اصــــدق لو يقوللى
حد يمشى معايا مشوارى اللى جاى
حد ما يجيش فجأة والقاه قاللى بــــاى
حد ياخد نصى واخد منه نصه
حد لو حختار فى عمرى الف مـــــرة
يبقى برضه هــــو نفســـه
يوم ما يبعد عنى يفضل جوة منى .. واعيش بحسه
يفهم انى لا بنبهر .. ولا بتسحر .. ولا تغيرنى الظروف
هى كل القصة انى عايزة اشـــوف
ولما اشب بشب بـــس عشان اشـــوف
وانى اكـــــتر واحدة تتأمن على العمـــر اللى جاى
وانى بتطور لكنى .. مافيش من الناحية دى منى .. اى خوف
*****
الخلاصــــة .. لو بيفهم فى المعادن والأصول
حبقى مش محتاجة اشرح نفسى اصلا والا اقول
حتة انك تشحت الفهم دى تـــــــوجع
تلقى نفسك ماشى تشرح .. انت ليه بتبقى هادى
وليه مع دوت بتضحك
وليه مع دوت مكشـــر
وليه للتانى بتـــــــردح
ليه بيأخدك السكوت اوقات وتســـرح
اللى بيزعلنى فى الموضوع دا إنى .. حد أوضح
والوضوح دا جايز انه يبقى هو اللى ملزمنى انى أوضح
*****
لما تبقى بسيــــط لدرجة خلاص ماهيش متصدقة
يبقى فعلا لأ بقى
السؤال يبقى ساعتها
من القلوب اللى الزمن بالغباء اصبح ناعتــــها
انتى ايه حقيقية والا ايه حكايتك؟؟
أرد اقول لأ انا بلاستيك
رد ساخر .. بس اهو جايب م الاخر
اللى مش قادر يصدق .. او يميز الفروق
قلبى مش ملزم يحبه .. او يقوله افهمنى فـــوق
*****
مرة واحدة حتة منى اوووى قالتلى
اللى انتى تبقى ضلعه... يبقى هو شكله ايه؟؟؟؟؟
ابتسمت وقولت .. ماهو لو بالمقــاس
يبقى واحد استحالة مهما نعمل حنلاقيه
ولو بالأحساس..
قلبى حــــــاسس ان ماخلصــــوش ولسة برضه فى