حسن جاد
أضيف بتاريخ: 2011/12/18
طول عمري نفسي يكون ليا صوت إنتخابي .. وأنتخب زي بقية خلق الله ، وكل إنتخابات كانت بتيجي أقول إمتي يطلع لي صوت وأعرف انتخب أنا كمان .. وليه لأ؟ هو أنا مش من الشعب وده حقي ..
وأقعد أسمع بقى الناس الكبيرة اللي بتتكلم عن الإنتخابات والمرشح الفلاني اللي هيكسب عشان ايه والمرشح العلاني هيخسر عشان معرفش إيه .. والدايرة دي بتزور والحكومة بتقفل صناديق ..وهما اصلا ميعرفوش الهلال من الجمل وعاملين لي فيها محللين سياسيين .. ومن كتر الرغي عن الإنتخابات والمغامرات الإنتخابية .. استنيت أكبر عشان أنتخب ..
و كام سنة وطلع لي الصوت اللي عشت أحلم بيه .. بقالي صوت إنتخابي يا جدعان .. وأقدر أنتخب بقى وأمارس حقي الطبيعي في إختيار عضو مجلس شعب أو رئيس جمهورية " على أساس يعني إننا بننتخب وبنختار والجو ده " بس ماليش دعوة .. المهم أعمل زي الناس وأحط الورقة في الصندوق وخلاص ..
إنتخابات 2010
إنتخابات 2010 كانت تاني إنتخابات تيجي وانا معايا الصوت الإنتخابي بتاعي .. وقولت المرادي بقه هنتخب يعني هنتخب لو حتي قالولي إنت من موزامبيق ..ماليش فيه هنتخب بردو .. هعمل بالصوت اللى مركون من خمس سنين ده .. دا انا لو مأجره كان عملي مبلغ وقدره .. وأكيد طبعا مش هعمل زي المرة اللي فاتت ، وينضحك عليا .. لا خلااااص ايام زمان وإنتخابات زمان راحت ..
المرة دي الدعاية الإنتخابية مأثرتش فيا ولا حطيتها في دماغي .. كان معيار الحكم عـ المرشحين .. خدمتهم لينا واللي ممكن يعملوه .. وظروف البلد واللي كنا عايشين خلت الناس متبصش لخمسيناية ولا حتي مياية و بقوا يدوروا عـ راجل كويس يخدمهم .. بس كانت في مشكلة .. تقريبا كل الناس اللي مترشحين في الإنتخابات وشوشهم قديمة اوي .. نصهم نواب سابقين .. ونصهم لواءات شرطة .. والكويس اللي فيهم .. فقير ومش من عيلة .. ومش هيخلوه ينجح .. وكنا خايفين من موضوع التزوير اللي اتخنقنا منه ده .. بس الحكومة ومنظمات البتاع المدني والناس دي طمنونا ان مفيش انتخابات .. قصدي مفيش تزوير ، واحنا صدقناهم .. دول حكومة ياعم .. هنعرف يعني احسن من الحكومة .
يوم الإنتخابات رحت علي اللجنة الإنتخابية اللي عرفت إن إسمي فيها من بدري .. " يحسن الصوت يقوم من الفجر ينتخب لوحده زى المرة اللي فاتت " .. لقيت طوابير ناس واقفة مستنية تنتخب .. أخدت دوري ووقفت في طابور زي طابور العيش " بصفته أشهر طوابير مصر " مستني الفرج ..وفي الطابور بقه تسمع أحلي كلام وأحسن تحليلات .. زي بتاع المرة اللي فاتت كده .. بس المرادي الناس إتنصحت ومبقاش ياكل معاها الفلوس بقه ياكل معاها حاجات تانية ..واهل المرشحين واقفين يعملوا دعاية ادام اللجنة بالسلاح .. وده يقولك محتاجين صوتك .. وده يقولك متنساناش .. وانا معلق عـ كلمتين مفيش غيرهم .." طبعا دا واجب علينا " .. ريحهم وخلاص ..
وطبعاً كرهت الإنتخابات واللي عملوها من الوقفة والزحام وعدم التنظيم والذي منه .. بس عشان ميروحش الصوت .. صبرت ووقفت ، شايف ناس عمالة تدخل وتخرج .. وانا مش هييجي دوري بقه ولا ايه .. عايز أعمل زي الناس يا ناااس .. وأخيراً جه دوري ودخلت اللجنة أنتخب وانا مش عارف هنتخب إزاي ولا الإجراءات اللي بتتعمل .." علي أساس إني داخل أفيش يعني .. جديد بقه في الموضوع " دخلت والراجل إداني الورقة اللي فيها الصوت بتاعي .. كنت هموت من الفضول عشان أمسكها وأشوف اللي طلعت عين أمي دي .. أحضنها ولا أبوسها ولا أتصور معاها " عبيط ميعرفش اللي فيها لسه " .. أخدتها ودورت علي الستارة اللي بيستخبوا وراها ويختاروا .. ملقتش .. الله هو مش في التليفزيون بيجيبوا ناس وستاير وصناديق شكلها أبن ناس .. أمال مفيش الكلام ده هنا ليه ... فضلت ماسك الورقة ومحتار اروح بيها فين .. والراجل قالي أنجز يا أستاذ وراك ناس عايزة تدخل .. " تدخل ؟ هو حمام ولا أيه "..ماشي يا عم .. علمت عـ المرشح اللي كنت ناوي إنتخبه واللي كنت شايفه مصلحة للبلد .. مش مصلحة للجيب ها .. وحطيت الورقة في الصندوق وتمام ..وأول ما خرجت من اللجنة .. مسكوني الناس هما هما .. ها عملت ايه ؟ قولتلهم عيييييييب الراجل بتاعكم حبيبي .. بتوع المرشح التاني مسكوني .. ها عملت ايه ؟ قولتلهم عيييييييب حبيبي الراجل بتاعكم ده .. اضحك انا عليهم مرة من نفسي ،وطبعا واثق مية في المية ان مفيش تزوير والعملية تمام .. بجد الناس دي شايفة شغلها بضمير ..
المهم عدي اليوم بطوابيره وورقاته وصناديقه .. وروحت البيت اتابع الإنتخابات والأنباء اللي عمالة تتقال وتيجي في الأخبار إن المعارضة كاسحة .. وأول إنتخابات نزيهة وتأثير معرفش في أعداد ايه والكلام الكبير ده " ايه هو الصوت بتاعي عمل كل ده " .. انا من زمان وانا حاسس ان صوتي ده له قيمة كبيرة وتقل انتخابي بس محدش عارف قيمته .. خسارة في البلد دي يا جدعان ..
وجه يوم النتيجة يا معلم .. وكانت الصدمة ، فوجئنا بأن اللي كنا مش متخيلين إنه ينجح خاااالص هو اللي إكتسح .. الله .. هيا أصوات الناس اللي كانت برة اللجنة دي اتبخرت ولا ايه .. فين المعارضة يا رجالة .. فين إكتساح المرشحين بتوعكم ..فين تأثير الصوت بتاعي .. فين التقل الإنتخابي ، وطبعا عرفنا ان الإنتخابات إتسودت لناس معينة .. اللي ليهم ضهر ومسنودين من الحكومة .. الله طب لما هيا كده كنتوا بتخلونا نروح ننتخب ليه بقه .. غاويين تعب وخلاص .. وبردو محدش قدر يتكلم ولا يفتح بوئه .. دول عتاولة ياعم ... ومعاهم سلاح المرادي ..
من الأخر اتنصب عليا كلنا واتعمل علينا أحلى فيلم مش انا لوحدي اهو اللي بينضحك عليا .. منكم لله .. ضيعتوا الصوت في الهوا ..
بقه يعني المرة اللي فاتت معرفش انتخب خالص والصوت يرح عليا .. والمرادي لما انتخب يزوروا الإنتخابات وبردو الصوت يروح عليا .. هو مفيش غيري انا والصوت بتاعي ولا ايه
وعدت تاني إنتخابات والصوت الإنتخابي بتاعي مازال مش باينله ملامح .. بس المرادي مكنتش هتشل .. اهو علي الأقل إنتخبت ولو شكليا .. المرة الجاية هتبقي شكلياً ومضمونياً .
ومن يومها وانا بردو بصبر نفسي للإنتخابات اللي هتيجي يمكن يتحول الشكل لمضمون .. مش كتير يعني كلهم خمس سنين وجايلكم
وللحديث بقية..
♥·٠•● Ƹ̵̡Ӝ̵̨̄Ʒ اضف تعليق Ƹ̵̡Ӝ̵̨̄Ʒ ●•♥·٠