|
القهر الحصري,في المجتمع المصري :( !
الناقل :
SunSet
| العمر :36
| الكاتب الأصلى :
monnnna
| المصدر :
www.konyonsa.com
سمعت كتير قبل كدا عن قهر الرجل للمرأة,
و كنت بشوف السي السيد و هو بيبهدل امينة عشان اتنيلت خرجت
و قريت كتب كتير عن الموضوع دا,و المصيبة انها كتب انجليزي بتحكي عن المجتمع الاوروبي يعني ياريتها جتي علي العالم العربي و خلاص دا واضح ان العدوي انتشرت 
بس اللي جديد و exclusive و مفيش منه 2 فعلاً هو قهر المرأة للمرأة
و دا موجود فقط و حصريا و لأول مرة في المجتمع المصري اللي عاوز يتحرق و يتبني من اول و جديد علي نضافة
تحت شعار "القهر الحصري,في المجتمع المصري"
لما تلاقي شوية ستات متجوزة علي شوية عواجيز, ماسكين بنت غلبانة و مستلمينها من المنقي خيار,انا مش عارفة انتي ازاي متخطبتيش هي الرجالة عميوا, دانا كنت متوقعاكي اول واحدة تتخطب في بنات عمك
لا لا خلي ماما تشوفلك حل احسن انتي كدا هتتاخري في الجواز,
دا طبعا متحبش بشوية نظرات شفقة و عطف
دا اسمه قهر مرأة لمرأة زيها,
ولا لما تلاقي صاحباتك اللي اتخطبوا فجأة حلقولك و مبقوش معبرينك اصلهم خلاص عبروا مع اللي عبروا خلاص و اتشعبطوا في الدبلة
لا و كماااان بتقولك ان خطيبها جابلها خمس وردات كل واحدة فيها خمس شوكات و كان جيابهم الخميس اللي فات
دا اسمه قهر المرأة لمرأة زيها و كمااان مرأة كانت في يوم من الايام صاحبتها
و لما تبقي مرات ابنك هي عدوتك اللدودة في الحياة لانها اتجرات و تطاولت و خطفت الحيلة
و يبقي كل همك تطلعيها اي كلام و مبتفهمش و ان ابنك غلط في اختيارها و انتي اللي من حقك تقرري هتاكل ايه و تشرب ايه و تلبس ايه و تربي ولادها ازاي,
دا بردو اسمه قهر المرأة لمرأة زيها
و لما تبقي في الرايحة و الجاية بتبصي لجراتك المطلقة من تحت لتحت علي انها المجرمة اللي كفرت بنعيم الحياة الزوجية المرفهة و عاوزة تمشي علي حل شعرها,و كل شوية تسمعيها كلمتين عن قد ايه هي غلطانة انها تسيب الجنةو تنزل الارض,لا و كمااان متنسيش تديها نظرتين شك ااااه يا اوختي الدنيا مش مضمونة و هي ممكن تضحك علي جوزك و تخطفه (دا علي اعتبار ان جوزك عنده 6 سنين و هتقوله تعالي اجيبلك حاجة حلوة او هتسقيه حاجة صفرا و هيروح يتجوزها بالغصب)
و كل دا و انتي قاعدة في بيتك مستريحة و مدية لنفسك الحق تحكمي عليها من غير ما تعرفي الظروف اللي خلتها تقبل لقب مطلقة و تنهي حياتها الزوجية بايدها, مش هيهمك سواء كان جوزها خاين ولا بخيل ولا مش متدين ولا بيضربها ولا بيشتمها, كل دا عادي بالنسبة ليكي المهم انك تحكمي عليها,مانتي القاضي و الجلاد و الشهود, و انتي بابا و انتي ماما و انتي كل حاجة
يبقي دا قهر المراة للمرأة
و لما تبقي الست اللي تاخرت في الانجاب بالنسبة ليكي كارثة متحركة و تجرييي قدامها تحكيلها عن مشاكل عيالك و قرفهم و يااااه متعبين و علي طول تعبانين و فيهم و فيهم كل العبر كانك مربية شامبانزي في البيت,
و دا كله علي اساس ان اللي بتكلميها عبيطة مش فاهمة انك فاكرة نفسك بتخزي العين,
علي اساس ان اللي معهاش ولاد هتدب عينها في ولادك فبتأمني نفسك
مش واخدة بالك ان لو خايفة قوي كدا ممكن تدعي في سرك ربنا يحفظهم,
و مش واخدة بالك انك بتجرحيها و بتحسسيها انها ناقصة و فيها عيب و انها مصدر خطر علي اي طفل مع ان المتاخرين في الانجاب اكتر ستات في الدنيا حنينين علي الاطفال و بيحبوهم
دا بردو اسمه قهر المرأة للمرأة
و لما تعتبري جوزها مشاع ليكي من حقك تتجوزيه ماهوي الشرع محلله اربعة و انتي مبتعمليش حاجة غلط يا بنتي,انتي يادوب بتتعرفي علي جوزها و تتكلمي معاه و تحسسيه قد اي مراته مش حاسة بقيمته و ان هو ولا الان دي لون في زمانه و اللي بيقدروه كتير بس هو يبص حواليه
ولا لما يتقدملك في بيتك و انتي عارفة انة متجوز بس مش مهم بقي انا و من بعدي الطوفان !
فيها ايه لما يبقي متجوز و عنده ولاد هو اصلا مش بيشوفهم في اليوم غير ساعات و انتي قررتي تاخدي لنفسك جزء من الساعات دي,
و فيها ايه لما تجرحي مراته و ترويها ايام سودا و هي عارفة ان جوزها عايش مع واحدة غيرها,
و فيها ايه لما تستحمل تعيش في الوضع دا لمجرد انها مش قادرة تستقل بحياتها و تربي ولادها لوحدها,
و فيها ايه لو اتطلقت بسببك اهو تبقي جت منها
المهم انتي يا حبيبتي,مينفعش تفضلي من غير جواز سواء كنتي انسة او مطلقة او ارملة او اياً كان وضعك,
المهم تتجوزي و في داهية ولاده و اللي خلفتهم احنا مالنا بيهم يا ستي
دا كمان اسمه قهر من مرأة لمرأة
و اللي يقهر اكتر و اكتر ان واحدة تشتكي ان جوزها اتجوز عليها تيجي واحدة تحمرهل عنيها
و بأجف اسلوب ممكن,انتي هتعترضي علي شرع ربنا,
و كأن ربنا قال للرجالة اتجوزوا لما يبقي عندكوا وقت فراغ, او اتجوزوا و سيبوا ولادكم للجارية تربيهم !
هو انهي الاولي انه يكون زوج يتبسط و يدلع نفسه, ولا انه يكون اب و يتحمل مسئولية ولاده و يربيهم,
يعني هو اصلا بيشتغل طول اليوم و بيرجع ينام و يصحي و هما نايمين و مش بيشوفهم اكتر من ساعتين تلاتة,
حتي دول مستخسرهم فيهم و هيخلي واحدة تقاسمهم فيهم !
و بعدين هو مش التعدد دا عاوز راجل مقتدر,طب لما هو فييس اوي كدا و رايح يفتح بيت تاني,بدل ما بعتر فلوسه ما يامن لولاده مستقبلهم و يشيلهم وديعة تنفعهم,ولا هو الفلوس متتصرفش غير علي ستات و لو اتصرفت علي ولاده و بيته بيتبخروا 
لا و ايه الشرع مش بنفتكر غير في الجواز,
عمري ما شفت مشكلة لواحدة جوزها ضربها و شتمها و شوفت حد داخل يقولها الشرع ميسمحش بكدا
دا هو كمان قهر المرأة للمرأة
يمكن طولت في اخر نقطة لانها اكتر واحدة فارساني و لانها اكتر حاجة فيها قهر من ست لست زيها لمجرد انها مش في نفس موقفها عملاً بمبدا "اللي ايده في الميه"
كل دي حاجات تخلي اي بني آدم طبيعي يتصدم من تصرفات بنات حوا في المجتمع المصري و يبقي في الحالة دي لازم نرفع شعار,
قهر المرأة للمرأة, صنع في مصر
|