■ ما تتلم بقى.. ماتخللى فى وشك شوية دم وتتلم بقى.. صحيح إنك صدغ وتبت وتلقيحة.. وعليك طلة.. أعوذ بالله.. سااااااااقعة.. بير الرخامة يا جدع؟؟.. والأكادة الأكادة.. غبى غباوة الكنغر.. يعنى هو لازم تتهزأوا فى الآخر؟؟.. مش فاهمة بتلعب أنهو جيم إنت؟؟..
زميلك لم الولية والحتتين وجرى ع السعودية.. والتانى سلم النمر واستموت وعمل فيها مريض مزمن.. والتالت وشه اتحرق وهرب ورجع وسلم.. والرابع كانت نهايته سودة كودة وحق هباب.. قتلوه بعد ما أهانوه حيا ثم ميتا ومثلوا بجثته.. بتلعب أنهى موديل إنت بقى؟؟.. طب بقولك إيه.. اهرب.. اتنيل اهرب قبل ما تتحط على خازوق فى أجدع ميدان فيكى يا دمشق.. والله العظيم أنا ماشفت كده سقوعية.. قال أسد قال.. دانت ما حصلتش فقمة..
■ ملحوظة مهمة.. كان القذافى هو مادة تسليتنا الوحيدة لعدة سنوات.. مع بدء قيام الثورة فى ليبيا ومقاومته الشرسة ليها.. أصبح الأفيونة التى ينام ويصحو عليها الشعب المصرى.. وخد عندك إفيهات وتريقة.. فى إحدى جولات الكر والفر صرخت فى استماتة: والنبى ما تموتوه.. إحنا عايزينه.. نحطه فى قفص قزاز ومعاه سباطة موز وميكروفون.. يا جدعان رمضان داخل ومش لاقيين حاجة نسلى بيها صيامنا.. إلى أن قتل.. وشاهدنا تفاصيل جره وسحله وطعنه وبقاء الجثة معروضة عارية على الملأ أمام أعين العالم فترة طويلة.. ألم تلاحظوا بعدها شيئا؟..
خرس الشعب المصرى.. انقطع فورا عن التريقة أو الضحك أو العبث فى جثته كما فعل الآخرون.. احترم جلال الموت.. وردد لا تجوز عليه إلا الرحمة.. حسابه عند ربه الذى أصبح بين يديه.. أهى دى أخلاق المصاروة.. فطرة طيبة وأصيلة.. نتوارثها بصفتنا متحضرين وولاد ناس وبنعرف ربنا من أيام ما كانت الناس على الشجر لسه.. مش منتظرين حد ياخدنا من قفانا يعرفهولنا..
■ ناس ليها بخت وناس شلاليت.. وبطريقة نجمى المفضل توفيق عكاشة الذى أتتبعه يوماتى حاليا بدون كلل ولا ملل.. يمكن بحاجات تانية.. وعلى طريقته أقول.. يعنى ياخويا مفيش نشال واحد عكر صفو دشليونية العباسية؟؟.. مافيش متحرش؟؟.. حدش تطاول على حد مثلا وقاله إوعى كده أنا مخاصمك؟؟.. طب بلطجى واحد لله؟؟.. سنجة تبل الريق والا مطوة والا بشلة؟؟؟.. ياساتير.. خلاص؟؟.. الإمن مستتب قوى والناس طالعلها أجنحة ملايكة؟؟..
سبحان الله العظيم.. اتضح إن البلطجى ده كائن سلعوى مهجن ومولود بست صوابع وزوائد معدنية على شكل مطوة فى إيد ومولوتوف فى الإيد التانية وموطنه الأصلى ميدان التحرير.. يتم تربيته وتلقيحه فى صوبات ع الطريق الصحرواى ثم إعادته إلى موطنه الأصلى مرة أخرى عشان يعيش بقى.. يعنى لو اتمشيت إفرنجى كده لحد سليمان باشا ما تلاقيهوش.. أضرب كف على كف وأقول.. أتاريك يا شيعب أهبل وعبيط.. مش متربى على مسلسل تمانية وربع وحافض كل الحركات.. حدش أصله يكرمه ويبعتنا نتعالج فى الخارج ونشيل العصافير اللى داقينها دى؟؟
■ سؤال للسادة أصحاب مقولة السياحة الحلال.. هما سكان البلاد التى تطبق فيها قوانين الحلال اللى بالعافية ده.. بيسيحوا بره ليه؟؟؟؟.. ده عندهم بحار وخلجان ومحيطات كمان.. ولهم موانئ ومراكب وسفن تجارية.. ومعاهم فلوس يسيحوا جوه زى ماهما عايزين.. بيهجوا على بره ليه؟؟.. لماذا يعرفون بالثانية والدقيقة والبوصلة لحظة خروج الطائرة من مجالهم الجوى عشان يقلعوا الأقنعة ويتنفسوا الصعداء ويزيطوا بقى؟؟.. وطبعا، لحظة ما تلمس أقدامهم أرض الخارج.. عاديك بقى عاللى بيحصل.. ياللا.. ربنا حليم ستار..
■ ما شاء الله ولا حول ولا قوة إلا بالله.. تسلم الإيد اللى ربت وكبّرت هذا الشاب النابه الذى يدعى إبراهيم الهضيبى.. الباحث فى الشؤون السياسية.. رأيته مرة أو اثنتين وتمنيت لو كان هذا الشاب يملك مساحة حرة يستعرض فيها معلوماته وعقله وأدبه..
■ استضافه يسرى فودة مع شاب آخر من حزب النور اسمه بكار على ما أعتقد.. المقارنة بين الاثنين شديدة الظلم.. فالآخر مثلا كان ضيفا على ندوة أدارتها الإعلامية أميرة عبدالعظيم فى تليفزيون الدولة على ما أعتقد.. جلس معها واشترك فى الحديث.. ثم رأينا الحلقة نفسها عندما أذيعت على قناة سلفية وقد غطوا وجه أميرة بمربع غبى كده عليه اسم القناة.. وبرر هذا الشاب ذلك التصرف بأنه حر.. عندما يذيع اللقاء على قناتهم يشيلوا وش الست.. هما حرين..
لا يا عزيزى أنت لست حرا.. هذا تعدٍ على منتج ومخرج ومعد ومقدمة البرنامج وحقوق للملكية الفكرية.. وإذاعة ما ليس من حقكم ليس حلالا.. ذاكروا شوية قرصنة بقى لو عاوزين تمشوها بالحق.. وهى إهانة لـ«أميرة».. أنا نفسى لا أقبلها، ولا هى بالطبع.. مش عايز تقعد قدام ست.. ماتروحش يا عزيزى.. هذا لىّ لعنق الأشياء.. زى بالظبط تبرير قبولكم للديمقراطية التى كنتم تعتبرونها كفرا مادام متفصلة على مقاس مصرى.. مفيش حاجة اسمها كده.. وإلا بعد شوية حاتلاقى ديمقراطية صعيدى وإسكندرانى وإجريجى.. وسمعنى سلام تجيبها كده تعوجها كده.. هى كده.. ديموكراسى..
■ فى المقابل وفى معرض حديث آخر.. ذكر ذلك الرائع إبراهيم الهضيبى مثلا أروع.. عندما قال على لسان شخص إيرانى: إننا قبل الخومينى كنا نرقص فى الشارع ونصلى فى البيوت.. ولكن بعد القفلة والكتمة أصبحنا نصلى فى الشوارع ونرقص فى البيوت.. واصل المعنى؟؟..
■ نحن شعب يحب النور.. مش حزب النور.. فى الضلمة بتطلع العفاريت.. يكفينا شرها نحن وإياكم.. مش فاهم أفهمك الأسبوع اللى جاى..
■ السيد عبدالمنعم الشحات.. هارد لك يا كوتش.. خدلك استراحة محارب قد خمسة وسبعين سنة كده..