|
انهارده فرحى يا جدعان…!!
الناقل :
SunSet
| العمر :36
| الكاتب الأصلى :
albransesa loly
| المصدر :
www.konyonsa.com
 |
نقره على هذا الشريط لعرض الصورة بالمقاس الحقيقي |
حلم كل بنت .. الفستان الابيض .. والليلة الجميلة اللى بتتجوز فيها حبيبها .. لكن للأسف ليلة العمر دى بشوف فيها حاجات كتييييير بتخنقنى .. حاجات ممكن ماكونش شوفتها فى كل الافراح لكن شوفتها فى بعض الافراح وبسأل نفسى اسألة كتير.. ليه دايما العروسة لازم تبقا لابسة فستان منفووووش وكبييييير وفيه فصوص واسترسات بتلمع كتير اوى؟ ليه دايما الميكب مغطى تلاتربع ملامحها او يمكن متعرفهاش من كمية الميكب اللى هيا حطاها؟ وليه الجمال عندنا مقترن بإنى ابقا ابيض من لونى الطبيعى عشرة مرات؟ ايه المشكلة لما ابقا حلوة على سمار او على لونى الخمرى الطبيعى مش ضرورى ابقا حاطة كميات وطبقات من المكياج اللى بتخلى العروسة كأنها لابسة ماسك؟ وتيجى تعترضى يقولولك “هو ده الحلو اللى بيبان فى التصوير .. انتى العروسة لازم تبقى مميزة؟” ياسلااام ما ابقا مميزة وانا “عروسة” بس؟ لازم ابقا “عروسة مولد” عشان اتميز يعنى؟
ونيجى لأهم لحظات الفرح وهيا داخلة العريس والعروسة القاعة تلاقى العروسة ماشية تشوط فى الفستان من الجيبونة السلك المنفوشة المكونة من 3 او 4 طبقات واستيك وكل الناس واقفة رافعين اديهم بالموبيلات بيحاولوا يلتقطوا احلى الصور الممكنة .. مع ان فى افراح كتير بشوفها الناس كلها بتبقى اعده كل واحد على كرسيه وبالتالى كل الناس بتشوف كل حاجة.
داخلة العروسة اوقات بيسبقها زفة على السريع بره القاعة او فى “ريسبشن reception” الاوتيل المكونة من 10 او 12 راجل بيغنوا اغانى قديمة على جديدة ومعانتهم اللى بحسها وهما بيحاولوا يعلوا صوتهم ويتخنوه بطريقة انك لو واقف جمب واحد فيهم ودانك هتتسور او هتضحك من الكوميديا اللى فى طريقة غناهم.. بس ملحوظة يعنى الزفة دى بتدى احساس جميل اوى بالفرح بالزات لو اتغنى فيها الاغنى القديمة زى نازلة السلالم واتمخطرى ياحلوة يا زينة…
والرقصة الأولى “الرقصة السلوslow” للعريس والعروسة واللى اوقات بيشاركهم فيها بعض “الكابل couples ” اللى فى الفرح ولازم نشوف فيهم بنتين بيرقصوا مع بعض او ولدين بيرقصوا مع بعض فى حالة من المرح وال يعنى خفة الدم.
أما البروجرام المعتمد لأى فرح هو تنطيط ورقص متواصل وبعدين فقرة التورتة ونقل الدبل من اليمين للشمال وبعدين استراحة للناس تاكل وبعدين تنطيط ورقص تانى .. ليه العروسة والعريس ميعدوش فترة اطول على الكوشة بكل شياكة مش ضرورى كل الفرح يبقا تنطيط ورقص.
اثناء الرقص بقا تلاقى البنات بتتهافت علشان توصل للعروسة وده طبعا من الزحمة وتحاول تمسك ايدها عشان ترقص معاها بحركات بسيطة و محفوظة اقرب لتمارين الصباح “ثنى مد ثنى مد” بس الحقيقة انها ممكن تكون مش عايز ترقص مع العروسة اوى هيا بس مستخسرة الفستان اللى جيباه بالشئ الفلانى والميكب والطرحة الاسبانش ميبانوش فى الفيديو.. اشمعنى اسبانش؟ ليه متبقاش طرحة عادية بسيطة ليه لازم بما انه فرح يبقا جليتر وسبانش وحلق و13 طرحة فوق بعض .. وبشوف بنات بتبقا خدومة بس خدومة زياده عن اللزوم شوية طول الفرح بيظبطوا للعروسة ديل الفستان او الطرحة او واقفة تمسحلها حاجة باظت فى الميكب .. واوقات بعض البنات عينيهم بتبقا مركزة مع الكاميرا مستنياها تيجي عليهم يمكن ابن الحلال يشوفها فى الفيديو وقلبه يتخطف وتبقا “سوسو اللى شافها فارس الاحلام فى فرح لولو واتقدملها عن طريق الفرح” مين عالم؟ .. وطنط اللى تلاقيها داخلة تخبط فى البنات بكوعها مستغلة قوتها الجسدية وحجمها وماسكة فى ايدها بنتها وبتحاول تديها للعروسة عشان ترقص معاها تطبيقا لنظرية “سوسو ولولو و العريس”.
اما بالنسبة لصحاب العريس اللى رقصهم دايما فيه حماسة عالية فيها شئ من التشنج بعضهم بيرقص بلدى احسن من البنات وتلاقى فيهم واحد تخين ومديها رقص بلدى ومالوش دعوة بحد .. وشابين على جمب بيرقصوا الرقصة الرسمية فى اى فرح وهيا انهم يفتحوا جاكت البدلة الفضى اللميع كأنه لسة نازل من الفضاء حالا وبيرقصوا بحزام البنطلون بطريقة غريبة وهو باصص بعنيه لفوق وسايب ايديه فى الهواه وبيشاور فوق.
واديييينى بقا الاغانى اللى تحولت كلها لأغانى شعبى وياريت يبقا الشعبى بمفهوم الشعبى بتاع زمان لا دى كلها شعبى بمفهوم دلوقتى اللى كلنا عارفينه امثال “كعبو كعبو – عالى الدى جى يالااااا – قلووووو قلووووو – انهارده فرحى يا جدعااااان – على يا على و احيانا بتبقا زكى يا زكى.
ومجموعة الاطفال اللى بيعدوا على الكوشة وبيجروا ورا بعض ويضايقوا المصور ومننساش البيبى اللى لازم نلاقي حد شايله وبيهزه علشان يطلع فى الكاميرا والبنوتة الصغيرة اللى بترقص على الترابيزة وماماتها وقرايبها فرحانين بيها وبيصقفلها.
ومننساش الاكل اللى دايما مبيعجبش العجب ولا الصيام فى رجب يعنى لو الحاجة الساقعة فى ازايز الناس تقول مش فى كانزات ليه؟؟ مع العلم ان مفرد الكلمة “كان can” وجمعها “كانز cans” اصله خطأ شائع بلاحظه وبيعصبنى ماااااااعلينا.. ولو البوفيه مفتوح يبقا عليه العوض ومنه العوض.
وفى اواخر الفرح بتيجى اللحظة التى تنتظرها كل فتاه وهى لحظة البوكيه اللى هترميه العروسة وتاخده صاحبة النصيب وتلاقى ساعتها البنات احتشدت وكل واحده نشفت نفسها وثبتت رجليها على الارض عشان مافيش واحده تزقها بسهوله وركزت نظرها بحيث يكون سن نملة الدبانة فى منتصف البوكيه وبعد التركيز العميق وروح التحدى و التنافس اللى مليت الجو تلاقى العروسة مظبتة اللية كلها مع صحبيتها الانتيم وخيبت امال عشرين بنت وقفوا وتزاحموا وربما حدوث بعض الخساير زى ان واحده تقع على الارض او تتشد طرحتها فى وسط المعركة الدامية وهي “معركة البوكيه”.
ده مجرد نقد لشكل بعض الافراح من وجهة نظرى ومقصدش بيه اهانة او الاساءه لأى حد انا بس حبيت اقول ان الفرح ده حدث جميل لو ربنا أراد والظروف سمحت وهتعملى فرح حاولى تخليه مميز مش بالضرورى التميز ده نترجمه لفلوس بالعكس التميز ده ممكن يبقا ببساطتك فى اختياراتك وفى لمساتك الانيقة وتنظيمك لكل شئ وفرضك لشخصيتك على شكل فرحك.
|