كرشك كبير ومش عارف توديه فين؟ هااااى بقولك انت…معنتش عارف تجيب لبس عشان مش لاقى مقاسك أسااااسا؟ هااااااى بقولك انت..اتصل ب09000900 …
المشكلة عندى مش فى الاعلان على فكرة , المشكلة ياترى اتصلت عشان تحل مشكلتك ولا استخصرت تمن المكالمة؟ جربت الشاى الصينى بتاع كله , ده جميل بيعالج كل أمراض الدنيا وبالمرة بيخسس ها؟ ولا مكبر برده؟ خلااااص بلاش شغل الاعلانات ده اصل 90% منها مالوش لازمة اساسا.. طب روحت لدكتور وعملت ريجيم واشتركت فى جيم وعندك اراده تخس؟….بيييس يا باشا ايه يعنى عندك كرش؟!! ده حتى الكرش هو السمة الرئيسية والرسمية لنسبة كبيرة من الرجالة فى مصر والحق يتقال الراجل ميعيبوش كرشه ده اللى عنده كرش يبقا ابن عز كده ومتربى على الغالى مش معصعص وهفتان..
طب والله ما أقصد اتريق على الناس اللى عندها كرش يمكن جينات بس العيب لما يبقا عندك القدرة انك تظبط جسمك ومتظبطوش .. وياعينى على البنات تلاقى البنت من دول فرحها قرب فيجيلها حالة رهاب اقرب للهلع وتلاقيها بتتصل بتلاتربع برامج التيليفزيون عشان تسأل ازاى اخسس اماكن معينة فى جسمى او افتح كوع ايدي اليمين اصله غامق حبتين او عايزة كيراتين الشعر عشان شعرها يبقى تمام .. فبسأل نفسى وانت فييييييين؟؟ بتعمل ايه عشان تعجبنى؟؟
ياترى فكرت فى هدوم بيتك فكرت تبقا شيك وقاعد لمراتك فى البيت بشكل كويس لدرجة انها لو مهملة فى نفسها تتكسف وتجرى تظبط نفسها كسوفا من حلاوتك وانت قاعدلها فى البيت؟ ولا طول النهار اعدلها بالفانيلة الحمالات “ولامؤاخذه يعنى فى الكلمة” و بتتلكك وتقول : اووووف الجو حر وانتى عايزانى ألبس ايه يعنى؟؟؟ طب عندك فكرة ان البنت من دول وبرده لما بيقرب فرحها بتنزل تعمل شوبنج مخصوص لهدوم البيت وبتقسم هدومها لأقسام كتيييير و مبتنساش فيها اى حاجة وده طبعا عشان تعجبك حتى وهيا فى البيت..طب انت ليه متعملش كده؟ مافيش مانع لما تسألها كمان هيا بتحب تشوفك لابس ايه فى البيت مش يمكن تريحك هيا وتطلع من الفانز بتوع الفلاللين البيضة.. إلا بالحق هى اسمها فانلة واللا فالنة!!!!
نيجى بقا لحوار الجزمة اللى انا ذكرته فى العنوان يمكن ذكرت الجزمة فى العنوان عشان القافية الى حد كبير بس ده ميمنعش ان الست بتاخد بالها من نضافة جزمة الراجل وبتفرق معاها وبتأثر على انطباعها عنه ومش الجزمة وبس دى الجزمة وشوية حاجات البعض يشوفها هيافات زى انك بتغسل سنانك كام مرة فى اليوم؟ بتستخدم dental floss “خيط الاسنان” ولا معندكش فكرة عنه وعن اهميته؟ ريحة بؤك حلوة ولاااا؟ بتستخدم مزيل عرق نوعه حلو ولا بتكتفى بالاسبراي؟ ياترى عارف نوع البيرفيم اللى هيا بتحبه عليك؟ مهتم بشعرك وجايبله كريم وشامبو ولا مكبر؟
على فكرة الحاجات دى مش هايفة خالص عارف ليه؟ لان عدم اهتمامك بالحاجات دى بالتدريج بيخلى الست تحس انك معنتش زى الأول .. زى ماكانت بتشوفك مثلا زى أيام الخطوبة .. وده بيوصلها احساس انها مش مهمة بالنسبالك عشان تعملها كل ده مع ان الحاجات دى بديهى تكون بتعملها عشان نفسك فى المقام الاول.. اوبيوصلها احساس انك فقدت جاذبيتك وبالتالى ده ممكن يزق ست عندها استعداد للأهمال انها تبقا هيا كمان مهملة ونرجع نلاقى حضرتك زعلان ان مراتك مش مهتمة بنفسها وفى الاصل انت ممكن تكون السبب…على فكرة انا مركزة على مظهرك ومتكلمتش فى المشاعر والاحاسيس والتفاهم والحنان والحب والكلام ده لان الكلام ده عايزله اعده تانية على رواقة .. ومظهرك ميقلش اهمية عن جوهرك..
الحاجات اللى فاتت دى بشوفها حاجات بديهية انا عارفة ان رجالة كتير هيقروا وهيقولوا انتى مقولتيش جديد وده لإنهم بيهتموا بنفسهم .. وبالنسبة للرجالة دى برفعلهم الشاااابو وبقولهم ميرسى على اهتمامكم .. اما الرجالة اللى مبتعملش الحاجات دى او منقصة منها حاجة بلييييز اهتم عشان تفضل جذاب فى نظرها ومتاخدش النصيحة على كرامتك او على الاقل عشان تجبرها متهملش فى نفسها..ولا اقولك بص انا وحشة وكلامى مش صح ادخل على جوجل واكتب “تزين الرجل لزوجته فى الاسلام” وسيبك من كل اللى قولته فوق