أنا عايزة أكلمك في موضوع مهم
أنا لا داعية ولا أنا مصلحة اجتماعية
بس أنا لاحظت حاجة غلط !!!
ونفسي إنت كمان تاخدي بالك من الحاجة دي
حاجة تانية
أنا مش بكلم البنات اللي فاتحينها على البحري !!!
أنا كلامي موجه للبنات المسلمات المحترمات
اللي كلهم بعتبرهم إخواتي
يا ترى مين بيشوف صور بروفايلك؟
يا ترى إنت وبس؟
يا ترى بعض أصدقائك؟
يا ترى كل أصدقائك؟
يا ترى كل الناس اللي على الفيس بوك؟
طيب ده مش حرام تسيبي صورك كده
لكل الناس وترجعي تندمي؟
إن صورك اتاخدت منك من ناس مش تعرفيهم
وكمان مش حرام عليكي
لما تحطي صورك بسهولة كده
لكل أصحابك حتى لو بنات؟
تخيلي بقى لو شباب !!!
وهل تضمني مصير صورك دي فين؟
يعني ببساطة لو زميلتك نزلت كوبي منها على جهازها
هل تضمني مين بيشوفها غيرها؟
وهل تضمني عمرك وعمر صديقتك؟
هل أي واحد فينا يضمن حيموت إمتى؟
وكلمة سر حسابك معاكي إنت وبس
وتفضل صورك على الفيس محدش يعرف يشيلها
وتفضلي تاخدي عليها ذنوب حتى بعد رحيلك
طيب بكره لما تتخطبي وتتجوزي إن شاء الله
حتقولي لخطيبك أو جوزك إيه؟
كنتي بتتسلي؟
ولا كنتي متعرفيش إن ده غلط؟
ولو حصلك مشكلة وحد ضايقك
وساومك على صورك دي
يا ترى ساعتها حتعملي إيه؟
وليه حاطة صورك أصلا؟
هل علشان تسمعي كلمات إطراء أو مدح من الشباب؟
ولا علشان أصحابك يعرفوكي؟
ولا علشان نفسك تعملي زي كل البنات وبس؟
ولا إنت حاطة الصور علشان يقولولك
زادك الله إيماناً وتقوى وورعاً !!!
ولا إيه ولا إيه ولا إيه؟
احنا مش عايشين في اليوتوبيا، المدينة الفاضة
لا، احنا عايشين على الأرض
كل 3 أشخاص، في منهم 2 فاسدين !!!
ودي مش نظرة تشاؤمية ولا سوء ظن بالناس
ده واقع وزيادة حرص
وحتى لو الحرص مبالغ فيه
فهو مش غلط أبدا
ويمكن البعض ميعرفش إن صور البنات
المنتشرة على المواقع وبالذات الفيس بوك
كلها بتتجمع في كتالوجات
وموجودة في أوكار مشبوهة كتيرة جدا
الفوتوشوب وغيره من البرامج بتلعب دورها
في تغيير الشكل والملامح شوية
علشان يعفو نفسهم من المسؤولية والمشاكل اللاحقة
والجرايد الصفرا أحب أعرفكم
إن أغلب اعتمادها على الصور المجانية
المنتشرة على الإنترنت
والضحية في الآخر إنتي، والمجني عليها برده إنتي !!!
كل ده طبعا بخلاف حكم الدين
لإنه أصبح من المعروف
إن وضع صور البنات على الإنترنت غير جائز شرعاً
وطبعاً أنا عارف الرد المتوقع من بنات كتير
"طيب وهو فيها إيه؟ ما البنات كلها عاملة كده! إنتو غاويين عقد وخلاص!"
إنت لازم تحافظي على نفسك وتكوني غالية جداً
لا، دنت لازم تكوني أغلى من أي واحدة في الدنيا
لإنك مسلمة !!!
يعني فيكي كل معاني الحياء والرقة والجمال
فلازم يا بنات تحافظو على نفسكو
إنت لازم تكوني كتاب مقفول
لازم تكوني أغلى من إن أي شخص يعرف عنك أي حاجة
أو حتى مجرد يشوف صورتك
بلاش تكوني كتاب مفتوح لكل من هب ودب!
يعرف اسمك وعنوانك وتاريخ ميلادك
ومش بس كده، ده كمان يشوف صورتك
وإوعي تقولي "مهم كلهم أصحابي ومعايا في الكلية!"
يعني كده كده بيشوفوني وعارفنّي
حقولك
طيب إنت فتشتي في ضمير كل واحد فيهم؟
وإيه اللي في دماغه من ناحيتك؟
أنا مش حكلمك إن مثلاً حد منهم
ممكن ياخد الصورة بتاعتك
وينزلها على الهارد عنده، وييجي أصحابه يتفرجو !!!
ولا حكلمك إن حد منهم
ممكن ياخد صورك يركبها على فيلم قذر !!!
ولا حكلمك إن حد منهم
ممكن ياخد صورتك يحطها في مسابقة
أجمل بنت محجبة على الفيس بوك
والحوارات السخيفة اللي بيعملوها
ولا حكلمك إنك وإنتي بتقلّبي في الفيس بوك
تلاقي واحدة أو واحد
عامل بروفايل بنفس اسمك ومواصفاتك وتاريخ ميلادك
وصورك طبعا !!!
اللي حتكون أقوى دليل إن ده إنت، ومش حد تاني
أو تشابه أسماء، أو حد بيلعب
ويستخدمه زي مهو عايز بقى
وممكن قد إيه يسيء إليكي
بس حقولك إن إنت لو عندك ولاد في البروفايل
حتى لو زمايلك في الكلية، أو قرايبك
هو إنت كده عادي؟
صورك لكل الناس زمايلك في الكلية كده عادي؟
وكل واحد منهم يكون عنده على الهارد فايل باسمك
فيه صورك إنت وزمايلك في رحلة الغردقة
وصورك وإنت بتاكلي جاتوه في عيد ميلاد مش عارف مين !!!
اللي أحب أقوله لكل بنت
أرجوكي خليكي غالية
وحافظي على نفسك
واعرفي إنك قبل ما تخوني والدك ووالدتك وخطيبك مثلاً
فانتي بتخوني الله، رب العالمين!
دلع البنات !!!
دلع البنات، البنات سايقه فيه
وكل واحدة وقتها مقضياه
وشاغله بالها بجمالها وده ليه؟
علشان تملّى عقلها مفضياه
التليفونات واللا الشات واللى فيه
زمن البراءة خلاص جه قضاه
أنا برضو منهم بس غيرهم فى إيه؟
لله بقرب وبطلب رضاه
بتبان مؤدبة، الإسم بس محجبة
تاتو وروج ولبس مضيقاه
تقابل ده وده وتروح تقول أنا معجبة
وليها أكتر من شاب معلقاه
في البنت الطيبة واللى دموعها قريبة
ومآمنة لأى حد مصدقاه
واللى يومين ترتبط واللى كتير متعذبة
وهو ولا فى حاجة مقلقاه
دلع البنات البنات سايقه فيه
وكل واحدة وقتها مقضياه
وشاغله بالها بجمالها وده ليه
علشان تملى عقلها مفضياه
أتمنى تشاركيني الثواب الغير منقطع لنشر الرسالة الغالية دي بإذن الله، على كل اللي تعرفيهم من البنات والسيدات، سواء على النت، من الميل والفيس بوك والمنتديات والجروبات، أو بره من الزميلات والقريبات والصديقات والمعارف، وبدعي ربنا إنك تستفيدي فعلاً بالرسالة دي، ويرزقك الزوج الصالح والذرية الصالحة اللي تقر بيهم عيناكي، وتنصلح بيهم سائر أمور دينك ودنياكي ... آمين