السلام لك والسلامه من هنا ليوم القيامه ياللى أظهرت الكرامه بعد عهد المرسلين ياللى من لعبك بمغزل تطلع البورصات وتنزل فوق دماغ لندن وتعزل لا نكشير الغزالين فيلسوف مايخيبش قولك كل فلسفتك فى نولك والتلاميذ اللى حولك بالمكاكيك شغالين لنجليز عايشين فى لذّه عندهم أسطول وعزّه وانت تضربهم بمعزه سوده بنت اربع سنين من هنا تيجى المقالب اللى مغلوب يبقى غالب واللى مطلوب يبقى طالب والهزيل ياكل السمين قول بدل بفتيك وبيرى يطبخوا بسيرج بابورى والبودنج ان كان ضرورى ياخدوا حته من العجين لا نجليز تاخد ما تدّى بالحفان من كل هندى واتنبح صوتك ياغاندى ماالتقيتش المنصفين قول مادام الحق ضايع والغرض بيع البضايع الحرام ساتر وسايع ولا نمشى عريانين يخضعوك ليه للتجاره ونت فى أرض الحراره كل قرش يروح خساره فى الزفير والنفتالين كل واحد عنده معده ماسكه روحه خدها قاعده ان طمع تخلق له أعدا يقعدوا له مرصصين عالقضيب والقطر ماشى يصبح العصيان بلاشى ون عملها ومااكتفاشى يبقى ياكل عزرائين ولا ياكل م المناجم فحم به ع الدنيا هاجم واللى به داس ع الجماجم أحياء ولا ميتين يازعيم الهند صومك حبّب العالم فى قومك وانتهت حجّة خصومك اللى باتوا ملبوخين كلهم واقعين فى حيره يعقدوا جلسات كبيره فوق موائد( مستديره) يعنى لسه محلقين يغضب الحاكم لنصحك يحبسك ويعود يصالحك وانت تستعجب وتضحك عالجبابره القحطانين يحسبوك طالب جرايه ترعبك هزة عصايه يلتقوك ياغاندى اّيه فى الجهاد صايم سجين كام زعيم فى الدنيا مثلك يرضى ياكل زى أكلك ولا يلبس زى شكلك كلّهم متحفلطين اللى بات ناصب مشانق واللى خايف م الشرانق واللى اهو بايت يعانق واللى قدامه الطحين