هجوس الجزل
الناقل :
mahmoud
| الكاتب الأصلى :
بادي بن جريعان
| المصدر :
www.alsh3r.com
هجوس الجزل
يا مرحبا يا هجـوس الجـزل يـا حيـه
أنـا أتمنـاك يــوم انــك تمنـانـي
اسكن بصـدري لـك القلـب ومحانيـه
والراس يفـداك لامـن جيتنـي عانـي
ولامن سكنت وغـدت الأبيـات عفويـه
أعلنـت منهـو يحـب الجـزل يقرانـي
من لطلسي.. للخليـج ..الـى شواطيـه
(ضيدان منصور) هو الاول وانا الثانـي
استغفـر الله مـن الكـبـر ومـواريـه
لكن سعاطيـري ايـلا ششـت تشعانـي
تدرون.. احسن لي انـي اغيـر النيـه
وين انت ياللي سكنت القلـب وحدانـي؟
شفني لفيتك وانـا بأقصـى السعوديـه
" كنت أحسب انك ورى الخفجي تحراني "
احلـم بشوفتـك لـو كنتـي حيـاويـه
القلب عطشان لك.. والصوت ما ارواني
اقبلـت لـك كلـي اشـواق ومحنـيـه
فـي ذمتـي ذمـه ان الحـب سرانـي
وطفا علـي موتـري واكملـت عبريـه
هذا الدليـل ان صوتـك هـز وجدانـي
حتـى فهقـت الـجـوازات الكويتـيـه
جيت أسألك.. وابغي تجـاوب علشانـي
وين أنت يومك مواعدني علـى الجية
لاتقولـّي: أعتذر..ماهـوب بأمكـانـي
العـذر مـا يشفـي جـروح الهواويـه
ولو تعتذر عادني مـن جرحـك أعانـي
صدك ضربنـي علـى قلبـي سواسيـه
وأنا ادري أني لو ابي امنعك ما أمدانـي
أيَـه.. بعانـي لمـن خليتنـي.. أيَــه
وياني من أسباب صـدك بنجـرح يانـي
لكـن لا زلَ لــي عــام وحـراويـه
مصير الأشواق تطفي.. والعمـر فانـي
أخذيـه مـن راسـي المطنـوخ يابنيـه
والله مـا يتبـع المقفيـن (عرجـانـي)
من راح خله وتلقى فـي العـرب زيـه
قد قالها اللـي علـى الطـولات ربانـي
مـن يكـرم الضيـف ويعـز الجلاويـه
لاقلت أنا مـن عوالـه يرتفـع شانـي
يهـون الكايـدات.. ويـدفـع السـيـه
ويسهـل المعضلـه.. ويزبـن الجانـي
وينـوخ الفاسـق اللـي زاد فـي غيـه
ويستر على الجار.. ويحامي على الداني
(ولو مات في ذمتي مـا مـات طاريـه)
يقولها الناس.. ماهـي هرجـة لسانـي