حب في المشرحه ..

 

 

فاكر أول مره شفنا بعض .. كنا واقفين في المشرحه حوالين الجثه 
كنت شايفاك بتبصلي أوي وانا كنت مكسوفه
وكانت كل أما عنيك تيجي في عيني أتكسف اوي وابعد بعنيا 
كان فينا براءه عجيبه وكان شكلنا صغير أوي وقتها

فاكر طيب أما كنا في في سنه تانيه وكنا واقفين في معمل الهستولوجي ..
وانت كنت بتشوف الميكرسكوب وانا كنت واقفه ضمن ناس كتير عايزه تشوف 
ولقيتك خلصت وحطيت الميكرسكوب قدامي ..
ساعتها سبته وطلعت أجري بعيد ..

ولا فاكر سنه تالته أما كنا في معمل الفارما ..
وانا كنت ماسكه الضفدعه وخايفه أوي 
ونطت من ايدي وطلعت تجري في المعمل 
وانت جبتهالي وخدرتهالي ..

طب فاكر في سنه خامسه أما الدكتور قال اللي معاهوش بالطو يطلع بره ..
وانت كنت ناسي البالطو بتاعك
كان نفسي ساعتها أديك البالطو بتاعي 
ووقفت زعلانه اوي لأني مش قادره أعملك حاجه
بس انت دقيقتين ولقيتك جبت بالطو وجييييييييييت

فاكر طيب أما جيت تكلمني لأول مره في سنه 5 وقلتلي انك معجب بيا
وعايز تتقدملي !!!
يا ربي كان حتة موقف .. أول مره أحس اني متلخبطه كده
ووشي ضرب الوان الطيف 
ومبقتش عارفه أقولك ايه 
علي قد ما كنت فرحانه علي قد ما قلبي كان هيقف من كتر الخوف 

فاكر يوم ما جبت مامتك وباباك وجيتوا عشان تطلبوا ايدي 
انا يومها كنت متحيره أوي وخفت لحسن معجبش باباك ومامتك
بس اما جيت عندنا وقعدت مع أهلك لقيتهم طيبين أوي زيك ...

فاكر أول مره قلتلي "بحبك" في التليفون 
وأنا سكت ومعرفتش أرد
واما قلتلي ساكته ليه ؟؟
ما تقولي حاجه طيب
قلتلك "شكرا ربنا يخليك والله "

فاكلر يوم ما خرجنا مع بعض بعد الخطوبه 
وكنت عايز تمسك ايدي عشان تعديني الشارع 
وانا مرضتش وقلتلك همسك في التيشرت بتاعك
كان شكلنا يضحك أوي
كنت عامله زي الطفل اللي ماسك في هدوم باباه 
بس أنا قلتلك اني وعدت ربنا انك مش هتمسك ايدي غير بعد كتب الكتاب 
عشان ربنا يباركلنا في حياتنا بعد كده

فاكر في امتياز .. اما دخلت عيانه مجروحه
وانت كنت هتخيطها
كانت بنت اموره بصراحه
وكانت عماله تبصلك 
وانا كنت واقفه بعيد متضايقه ومتغاظه 
واما خلصت خياطه رحت اتخانقت معاك
وكلمتني باليل صالحتني ..


طب فاكر يوم ما عيانه شافتنا
وقالتلنا ربنا يخليكوا لبعض ويرزقكم بالخلف الصالح ؟؟
ساعتها قلت اميييييين من قلبي 
وفرحت أوي بالدعوه دي أكتر من فرحتي بأي دعوه سمتها في حياتي ..

الدكاتره لما بيحبوا بتبقي مواقفهم كلها كده :D:D

القصه خياليه وأي تشابه بينها وبين بعض الشخصيات في الواقع صدفه بحته

أنا قلت أهو :D:P
____________