عيد ميلاد سعيد يا مصر
الناقل :
elmasry
| الكاتب الأصلى :
د.محمد فؤاد أبو العز
| المصدر :
www.youm7.com
اللى حلمه حلمنا.. واللى دمه دمنا.. يبقى واحد مننا.. كادت عينى – تطرف – مش تذرف.. دمعتين تلاتة عندما شاهدت هذه الأغنية لعمرو دياب الهضبة كما يقولون.. المهم بينما تتردد الأغنية التى تصف السيد الرئيس المخلوع بأنه واحد مننا، هوه احنا وحشين أوى كده؟
بينما تتحرك أمامى صور السيد المخلوع فى إحدى أيامه فى الحكم، وأذيعت فى عيد ميلاده وهو يلوح بيديه للنواب فى مجلس الشعب.. كنت هعيط خلاص.. مش قادر.. يالهوى دنا لو طايل الناس إلى كانت معايه فى التحرير دول دلوقتى كنت..! كنت أعمل فيهم إيه ولاد الإيه دول؟ يخرب بيوتكوا.. كده.. كده تعملوا فينا كده.. يا شوية مندسين خونة.. يا شوية أجندات منك ليها ليها له.. بقى ييجى علينا يوم 4 مايو.. من غير ما نشوف الريس فى التليفزيون.. ومن غير أغنية عمرو دياب.. ومن غير ما نسمع خطاب عيد العمال، ونقول المنحة يا ريس..!! هيه الناس دى مش عارفه قيمة الريس؟ طب كل ده يهون ومقدور عليه.. إزاى تانى مش هنسمع أغنية اخترناه وبايعناه.. لا بيدينى ولا يرقينى ولا فيه مصلحه بينه وبينى، إلا بلدنا وحب بلدنا، وبقولها ورزقى على الله.. يا راجل.. بقى رزقك على الله بعد كل ده؟
ياه يا بلد بتفضلوا مصلحة الشعب والدولة على عيد ميلاد الرئيس وبتقوموا بثورة ويقلبوا العالم كله.. وبعد 100 يوم تنسوا تحتفلوا بميلاد الرئيس وبتفكروا فى كلام فارغ؟.. بقى قال إيه حرية وعدالة اجتماعية وتعملوا مصالحة بين فتح وحماس، وتزعلوا نتانياهو.
وأكيد دا يزعل السيد الرئيس إلى كان بينفسن على بتوع حماس، عشان شبه الإخوان المحظورين ولاد المحظورة.. بقى ده اسمه كلام يا جدعان.. نسيب عيد ميلاد الرئيس والتورتة والشمع وفيلم الناصر صلاح الدين.. ونفكر فى مستقبل مصر والبرادعى إلى هينجح ولا عمرو موسى.. يالهوى يا شعب ناكر للجميل..!
قال إيه عاوزين دستور جديد من غير المادة 76 و77، الله يحرقهم بقى.. وعاوزين ريس منتخب.. وعاوزين مجلس شعب محترم مش بتاع موافقة ولا الوزرا بياكلوا اللب وبيلعبوا فى الموبايلات جيمز.. ده اسمه إيه ده؟ أنا عاوز واحد عاقل محترم يرد عليه ويقولى إزاااااااااااااااى.. إزاى ترضيلى حبيبتى.. احتفل بيكى وانسى الريس يا مصر؟.. إزاى ننسى إلى حكمنا 30 سنة وعبر بينا من كوننا دولة أفريقية إلى أننا بقينا لا دولة ولا أفريقية ولا أى حاجه؟
إزاى يا عالم ننسى نجيب الشمع للسيد الرئيس؟.. أمال هيولع فينا بإيه؟.. هيفرقع فينا أنبوبة بوتاجاز؟ هو إحنا لاقيينها أصلا؟.. ولا الريس هيشترى أنبوبة بـ 60 جنيها عشان يفرقعها فى وشنا؟.. ما نستاهلش أكيد.
بس أنا عندى سؤال.. هوه إحنا كنا هنجيب للريس كام شمعة فى عيد ميلاده الـ 83؟ هو فيه تورتة تساع 83 شمعة؟ أكيد طبعا فيه.. مصر.. هو فيه تورتة أحلى من مصر نهديها للريس؟.. لكن هو زى ما قالت لطيفة صافى القلب يا كفر مصيلحة وهادى وأبسط خلق الله.. رفض إنه ياخد التورتة لوحده.. وراح هابش حته كبيرة كده عشان جيمى حبيب قلبه.. ووزع الراجل وما ظلمش حد.. كله هياكل.. كله هياكل يا رجاله.. محدش يبص فى لقمة حد.. كلكم هتشبعوا يا ولاد المفجوعة.
أنما للأسف الأسيف.. محدش شبع من المفجوعين.. بلعوا التورتة كلها ونسيوا أنها مبنية على عمدان.. وقف فى زروهم كام سيخ حديد عز، وراحوا فى حديد طره.
كل سنة وأنت عايش يا ريس، والعيد ميلاد الجاى تحتفل بيه إن شاء الله مع الولاد.. والمدام ممكن تكلم وزير الداخلية يعملها إذن زيارة..عشان تيجى تحتفل معاكم فى مزرعة طره.
وبلاش شمع بقى أحسن الناس ما بترحمش.. هينبروا على سيادتك ويقولك ياااااااه هو لسة عنده فلوس يشترى شمع؟