طول عمري

طول عمرى

طول عمرى عايش فى ساقية بتلف بسنينى ومغمضة عيونى

جيت اشوف بقى -- لقيت خلاص الشقى ودمع البكى صحبونى

ولا يوم كنت فهلوى -- ولا فتوة وواد قوى -- بس حلقة فى ودنى وبالوالدين احسانا

من صغرى فى الدنيا -- شلت الهم -- تعبت غم -- والحزن اتلم -- واتشال عندى

مشيت شوارع -- والفعل مضارع -- وعايش مصارع وقت الازمات

حساباتى -- الضرب فى الخناقات -- والقسمة على النصيب -- ويساوى فى التراب ايه

شبابى فى جيشك حصل -- وفرحت شعب انتصر -- ونيشان معايا والتقدير وصل

شلت الفاس -- وربط الراس -- وعزقت الارض -- وصونت العرض

رويت فى زرعك اه -- وجنيت فى حصدك يا -- والقطن خيرك الله

تحت النخلة قعدت -- جبنة قريش بالعيش وكلت -- وبوست الايد وش وضهر

م الفجرية ع الارض واعدى القنايا -- اتعب اريح واغنى يا هنايا -- قبلت سعتها ام العيال

بنيت فى الارض بيت -- عمرى ما قلت ياريت --عمارة باسانسير

فى الكبر-- الشعرالاسود خاصمنى -- وعداد السنين صاحبنى -- والظهر انحنى وتاعبنى

وعشان ربك كريم -- رزقنا بالواد كريم -- والبت هدية -- ولقمة هنية بتكفى ميه

عيشين مستورين الله يا سلام -- فى نن العين من جوه متصان -- فضل ربى عليه

بحمده واشكره صبح وليل -- بس اقدر ارد ربع الجميل -- انا انسان وقلت الدليل

طول عمرى عايش فى ساقية بتلف بسنينى ومغمضة عيونى

ايمن طه