كلنا عايزين ننجح سواء بقى النجاح الوظيفيأوالتعليمي أو التجاري .. الاجتماعي أو أي حاجة تاني علشان النجاح هو مطلب كل الناس حتى اللي بنعتبرهم فاشلين فهم نجحواعلى الاقل ف إنهم يكونوا فاشلين بس إيه هو السبب اللي يخلينا ناجحين ؟ هو ده السر و بيتهيألي أهم حاجة علشان تنجح هي ان هدفك يكون هدف كويس في فايدة للناس قبل ما تكون ليك و تكون عندك النية الصادقة ف تحقيقه و يكون برضه عندك الإصرار على الوصول ليه و رؤية واضحة للطريق اللي هتمشي عليه و وعي بإنك لما تخطئ متقعش ف نفس الخطأ مرة تانية بس النجاح بيتم تحت شعار جملة قريتها قبل كده افعل ما يهم وما ينفع , تكن ناجحا " ها يا ترى مؤمنين بالجملة دي؟ الموضوع كبير و محتاج مناقشة بس خلونا الاول نبدأ بحاجة مهمة .. عادات النجاح العشرين ببساطة هي الحاجة اللي لو اتطبعت عليها ممكن تحقق النجاح نبدأ و نقول عادات النجاح 1. خليك واقعي يعني متعش ف خيال ملكش القدرة على تحقيقه. 2. حاول تستفيد من كل موقف مر عليك حتى لو مكنتش طرف فيه و كنت مجرد متفرج علشان تخلق خبرتك بالحياة. 3. كافئ نفسك بمعنى كل ما تحط لنفسك مهمة و تنجزها كافئ نفسك و المكافأة تزيد كل ما وفرت وقت اكبر. 4. اعتبر إن مفيش مشكلة إلا لو ليها حل .. السهراية كلها ف إنك بتشوف المشكلة من أي زاوية .. يعني لو استعصت عليك مشكلة افصل نفسك عن الواقع 5 دقايق و اخرج من المشكلة و اتعامل معاها كمتفرج و ليس كطرف من أطرافها هتلاقي الحل بمنتهى السهولة. 5. احترم نفسك علشان تجبر الناس على احترامك. 6. تسامح مع اللي ظلمك أو كرهك أو تنافس معاك بأسلوب غير شريف .. و هى دي اقوى قوى النجاح. 7. لو اعتبرت الحياة طريق مظلم كلنا بنمر فيه الناجح اللي فينا اللي يخلق نور في الطريق ده لغيره. 8. إياك و استعمال شماعة الظروف .. تعامل معاها و كأنها عقبة لا تتجزأمن النجاح .. بمعنى إن نجاحك يكمن في التغلب عليها و يا أنت يا هي. 9. اتعلم و ارجع للدراسة من وقت للتاني حتى لو كنت خلصت. 10. خليك انسان فعال مش رغاي ( أفعال لا أقوال يعني ). 11. لك أخطاء ثم أخطاء ثم أخطاء .. كده كده هي لازم تبقى موجودة .. فمتعكننش على نفسك و تفكر فيها على طول اتعلم منها و ضيفها لرصيدك و حاول متتكررهاش . 12. خلي نفسَك طويييييييييييييييييييييييييييييييييييييييييييييييي يييييييييييل من هنا لآخر الدنيا .. باختصار خلى عندك مثابرة . 13. ابدع و ابعد عن تقليد الآخرين ما هو علشان تكون ناجح لازم تكون مبتكر و مختلف. 14. الوقت كالسيف إن لم تقطعه قطعك .. حكمة مهمة بننساها كتير .. و في حاجات بنفشل فيها لمجرد إن الوقت ما اسعفناش .. وقد تكون المهمة سهلة جدا جدا لكن المشكلة في الوقت . 15. افهم الناس و اتعلم من تجاربهم و خليك كويس معاهم للنهاية حتى لو كانوا وحشين معاك. 16. على الأقل لازم يكون عندك مجموعة من الناس اللي بتحبهم و بيحبوك تضع ثقتك فهم و تعتمد عليهم .. ما احنا بننجح باللي حوالينا برضه .. و مينفعش تكون لوحدك محدش يقدر يعيش على جزيرة لوحده منعزل عن بقية الخلق. 17. اتعلم الاعتراف بان غيرك على حق حتى لو مختلف معاك . 18. اعرف انت مين و عايز إيه و رايح فين و ايه طريقك و مين ناسك و ايه قدراتك و لحد فين ممكن تتعب و متدخلش سباق الا و انت عارف انك ممكن تتنافس فيه بشرف .. 19. خلي ليك رؤية عامة تتضمن مجموعة من الأهداف . 20. و أهم حاجة الالتزام بدينك و المبادئ .. المبادئ عاملة زي الشنطة التقيلة اللي لازم تشيلها و انت مسافر و الناس بين 3 أنواع : ناس بتخلي مبادئها هي الطريق اللي ماشية عليه من غيرها مفيش طريق أساسا و ناس بتفضل شايلاها لحد ما تتتعب منها و تسيبها و ناس بتحطها ف جيبها و هي عارفة ان جيبها مقطوع مستني ردودكم و وجهات نظركم .. و إن شاء الله هنضيف حاجات أكتر للموضوع .. كلامي ده ممكن يكون صح و ممكن يكون غلط و انا مش أهل للنصيحة بس دي حاجات اتعلمتها حبيت اتشاركها معاكم