ازاى اشيل اخو خطيبى من دماغى واخلى خطيبى يعاملنى زيه

مخطوبة بقالى سنة بس اعرف خطيبي من قبل الخطوبة بسنة كنا بنحب  بينى وبينه 5 سنين وهو عنده اخ واخت توام اصغر منه بتلات سنين يعنى اخوه اكبر منى بسنتين

المهم

انامش عارفة ابدا ازاى اناتقريبا مش بسمع كلام حلو الا من اخو خطيبي وعلى فكرة هو خاطب بس خطوبة صالونات ومن قريب مش من فترة

يعنى مرة رحت فرح مع عيلة خطيبي وكانوا مستنينى فكنت لابسة فستان ومظبطة نفسي اول مانزلت خطيبي شافنى وماقالش كلمة وودانى عشان اركب العربية مع باقى اهله لقيت اخوه بيقولى ايه القمر ده شكلك زى القمر انهارده فقلتله ربنا يخليك وخلاص وقلت لخطيبي بعدها انت مالتش حاجة ليه هو اناشكلى وحش راح قالى لازى القمر قلتله طب ماقلتليش كده ليه هو انا لازم اسالك راح قالى مانتى كمان ماقلتليش حاجة منا كمان لابس بدله رحت ساكتة حسيت ان الكلام مفيش منه فايده

موقف تانى كانوا معزومين عندنا عالفطار 3 يوم رمضان جم كلهم خطيبي جه ودخل وولا كانه يعرفنى واخوه دخل راح قالى كل سنة وانتى طيبة واعد يهزر معايا ووانا بحضر الفطار لقيت اخوه دخل المطبخ لان المطبخ مفتوح عالصالة وعادى اى حد يدخله واناكنت لابسة الطرحة عادى لقيته دخل المطبخ وعمال ياخد منى الاطباق ويساعدنى ويهزر معايا وخطيبي قاعد بيتفرج عالكرسي ومافكرش حتى يقوم زى اخوه او حتى يزعل لا عادى معاه بعد الاكل خطيبي قام وعمل ارفان من الاكل لانه مابيحبش البامية واحنا كنا عاملينها فماما قالتله اعملك اى حاجة تانية قالها لا

لكن اخوه قعد طول الاكل يقول لماما تسلم ايدك ياطنط وخللى ماما وبابا بيموتواااا فيه لدرجة ان امى قالتلى ياريتك كنتى اتخطبتى لاخوه

وبعد كده دخل المطبخ قالى عايز ميه رحت شربته ورحت عطياه بيبسى راح قالى تسلم ايدك وقعد يهزر معايا كتير وكنت حاسة اليوم ده ان هو خطبيبي والله

واللى اكتشفته اليوم ده ان اهل خطيبي امه وابوه واخته بيموتوا فاخو خطيبي ده بيحبوه اكتر من خطيبي بكتيرررر ولو طلب حاجة لازم تتنفذ لكن خطيبي رخم وملوش فالمجاملات والكلام الحلو وده مخلى الناس كلها بتشكر فاخوه ومحدش بيطيقه

ده حتى يوم خطوبتنا انا لما كنت فالكوافير ومستنياه لقيت مين داخلى تفتكروا لقيت اخوه دخلى وقالى ايه القمر ده وانا فرحت جدا لانى عروسة ونفسي فاى كلمة تفرحنى بعدها لقيت خطيبي جه وراح واخدنى كانه بيجر جاموسة وركبنا العربية وحتى مش بيبصلى مع اننا مش متعاركين رحت قلتله ايه متقول اى حاجة راح قالى اقول ايه انا مرتبك قلتله شكلى وحش راح قالى لا انتى خضتينى انا اول مرة اشوفك بكمية المكياج دى قلتله طب يعنى حلو ولا لا ولا عفريته انا ادامك راح قالى لا حلوة والله انا اسف متزعليش

بس بعد ايه فضلت طول الفرح زعلانة لانه الكلام الحلو انا اللى طلبته وماجاش لوحده ومن ساعتها واناشيلاهاله ومش قادرة انساها وفنفس اليوم بتاع الخطوبة ده كنت لابسة فستان خطوبة تايبست يعنى على اد الجسم وبعد كده منفوش من الديل فكان كل شوية اخو خطيبي يجيلي فودنى يقولى ماتوطيش

ايه الفستان الضيق ده

خطيبي بقى ولافكر يقول كلمة

مواقف كتيرررررررررر مش عارفة احكى ايه ولا ايه

ولما اروح ازورهم فالبيت خطيبي بيتعامل بقله زوق وكانه بيتفلحس ادام اهله

لكن اخوه واحنا كلنا قاعدين الاقيه قام عملى كافى ميكس مثلا ويدهولى ويقولى اناعاملهولك قوليلي رايك بقى

بجد حركاته فظييييييييعة

ودايما لما اتصل بيه عشان اساله على خطيبي مثلا او عشان اى سبب يقوم يكنسل ويكلمنى هو وقبل كده قلتله بلاش تعمل كده قالى ملكيش دعوة لدرجة ان اخيرا خطيبي اخد باله من حاجة مرة اتصلت بيه لان خطيبي موبيله مقفول راح مكنسل ومكلمنى ودور على خطيبي واداهولى يكلمنى فخطيبي اخد باله ان اخوه هو اللى متصل راح متعارك معاه عالسكة واناسمعت قعد يقوله انت اللى متصل راح قاله انا كنسلت عليها وكلمتها راح خطيبي قاله دنتا مبتعملش كده مع خطيبتك راح قاله يعنى انا غلطان انى بعاملها كويس راح قعدوا يتعاركوا وخطيبي قفل السكة

وهما ساكنين جمب تيتة لما اتصل بخطيبي اقوله عايزة حاجة يناولهالى عند تيتة يبعت اى حد بمنتهى البطء اما اخوه بلاقى نفسي يدوب اقفل السكة والاقى اللى اناعايزاه ادامى

وعلى فكرة بيعامل خطيبته بمنتهى الزوق كده برضو وبيخلينى نفسي اولع فخطيبي لما بشوف فرق التعامل بجد مخليها طااااااااايرة وبحس انه راجل بمعنى الكلمة انا ليل ونهار بحسدها عليه اوووووووووووووووى

بجد يابختها كان نفسي اكون مكنها اووووووووووى بحب حركاته

هو زى القمر والله فيه شوية شبه من رامز جلال فالجسم وطويل كده بس احلى من رامز كمان بكتيررررر قمر بس برجولة يعنى مش شب سيس لا

اماخطيبي امور برضوا اوى بس طخينننننننننن مكانش كده انا اول معرفته من سنتين او سنة ونص كان فجسم اخوه بس كسووووووول اخوه فضل جسمه حلو لانه بيحب الحركة ااما خطيبي بيحب يانتخخ

وفجاءة طخن وطلعله كرش وبقى فظيع ولما بقوله يخس بيركبه ميت عفريت

انافالبيت عندى بقوا بيموتوا فاخو خطيبي من ساعة اخر مرة دى لما كانوا معزومين عندنا لدرجة ان اخته التوام قالتله اناحاسة انك خطيبها واخدناها ضحك وخلاص

ولما جه يخطب سالنى عالبنت اللى هيخطبها وقالى يهمنى رايك اكتر واحدة وخلانى انقى له خاتم قراية الفتحة بتاعه وجبته مقاسي كمان ههههههههههههه وكانى انا العروسة

زوق اوى وبيعامل امى احسن من خطيبي واى حاجة بيعوزها بيتصل بيا او بيقول لاخوه يسالنى

اى حاجة بناتى زى كوافير الفرح مثلا سال خطيبي واتصل سالنى ايه احسن كوافير وكده ومفكرش يسال خطيبته قالى لو قلتيلي احسن كوافير هودبها على طول رحت قلتله راح رايح حجزلها منغير حتى مايسالها

انا بجد حاسة انه بقى شاغل كل تفكيرى

اناكده مش قيلالكم كل حاجة اناكتبت اللى فاكراه وغير ان الموضوع كده هيبقي ممل انتوا هتقروا ايه ولا ايه

بس بجد اناحيرانة ازاى اشيله من دماغى وازاى اخلى الرخم خطيبي يعاملنى بزوق كده زى اخوه او بحنيه بدل البرود اللى احنا فيه ده انابجد نفسي اغمض عينى وافتحها الاقى اخوه هو اللى خطيبي معرفش ازاى